Къумукъ театрда къонакълыкъда

24 февраля 2021 в 21:50 92
Халимбекавулдагъы орта школаны оьр класланы охувчулары къумукъ театрда къонакълыкъда болгъанлар. Яшлар Дагъыстанны халкъ шаири ва драматург Абдулвагьап Сулеймановну «Давда той» деген драмасына гёре салынгъан спектакльгъа къарагъанлар.

Бизге билдирген кюйде, белгили шаирибизни ва драматургубузну асарына гёре салынгъан спектакль охувчу яшлагъа бек таъсир этген. Яшлар, баш игитлени таза сюювюн сезип, ону гьалиги замангъа хас болгъан Интернет «сююв» булан тенглешдирмеге, сюювню арасына дав гирсе де, герти сююв не тюрлю четимликлерден оьтмеге болагъанны спектакльни баш игитлерини мисалында билмеге болгъанлар.

Спектакльгъа охувчуланы алып гелген муаллимлени юрегинде гьалиги яш наслу теманы англамас деген къоркъув болгъан буса да, сагьнагъа тикленген яшланы гёзлеринден акъгъан гёзьяшлар оланы шо къоркъунчун ерсиз этген. Неге тюгюл де, артистлени сагьнагъа гьар чыгъышы бизин халкъыбызгъа хас болгъан адатланы, герти сюювню гючюн ва инамлыкъны къаравчулагъа бар кююнде етишдирмеге бажаргъанлар.

Спекталь битген сонг, Халимбекавулдагъы орта школаны  директору Шамала Ибрагьимова къумукъ театрны баш режиссеру булан ёлугъуп, школагъа «Тёлев» деген наркоманиягъа къаршы салынгъан спектакль булан гелмекни тилеген.