Къоллавчуланы санаву йыл сайын арта…

Россияны аманат банкыны къуллукъчуларыны гюню Россияда 1998-нчи йылда касбу байрам гьисапда негьакъ токъташдырылмагъан. Белгили болгъаны йимик, 1841-нчи йылда орус пача 1-нчи Николайны къарары булан ноябр айны 11-нде аманат касланы къурувгъа байлавлу гьазирленген къарары тасдыкъ этилинген.

Биринчи аманат  каслар Санкт-Петербургда, Москвада ва Одесса шагьарларда ишлемеге башлай. Шондан сонг  Россияны гьар тюрлю вилаятларында  арадан 15 йыл оьтгенден сонг 45 аманат каслар ачыла…

Октябр инкъылапдан сонг большевиклени девюрюнде, 1922-нчи йылда коммерция банкланы гьисапгъа алмагъанда, аманат банкланы аты пачалыкъ загьматчы аманат каслары деп юрюле… Арадан оьтген вакътини ичинде аманат касланы аты алышына турса да, тек шо гюн-бугюн эсгерилген къуллукъ айлана якъдагъы финанс кризислеге де къарамайлы, къоллавчуланы ва пачалыкъны пайдаларын якълай демеге ярай.
Гьалиги заманда Россияда оьзюню гьар тюрлю бойларында, демек, 83 регионунда  14 мингден къолай бёлюклери чалыша ва къоллавчуланы къуллукъларын кютюв булан машгъул бола.

Бугюнлерде Россияны аманат касларыны къуллукъларындан пайдаланагъанланы санаву 97 миллионгъа етишген. Тыш пачалыкълардагъы къурумланы ва айрыча адамланы Россияны аманат касыны къуллукъларындан пайдаланагъанланы санаву 11 миллиондан айлангъаны гьакъда да айрыча эсгермеге тюше.
Россияны бары да регионларында аманат касны къуллукъларындан пайдаланагъан къоллавчуланы ихтиярларын, демек, харжларын якълайгъан хас къуллукълар да чалыша. 2022-нчи йылны арадан оьтген тогъуз айыны гьасиллери аянлашдырагъан кюйде, оьтген йылны шу вакътиси булан тенглешдиргенде, аманат касланы къуллукъларындан пайдаланагъан къоллавчуланы санаву Дагъыстанда 50 процентге кёп болгъан, демек, уьч керен артгъан.

– Аманат банкны къуллукъларындан гьалиги заманда пайдаланагъанланы ихтиярларын, пайдаларын якълап, оланы гелимлерин артдырмакъ учун салынгъан акъчалагъа къошулагъан процентлери гётериле, – дей Сбербанкны Дагъыс­тандагъы бёлюгюню управляющийи Евгений Морозов. – Гертиден де, гьалиги заманда аманат банкны къуллукъларындан уьйде туруп пайдаланмагъа имканлыкълар болдурулгъан.

Бугюнлерде къоллавчулар бир йылгъа сакълавгъа с­алагъан харжларыны ­уьстюне 7,7 процентге ерли къошум этилине. Сакълавгъа салмагъа 3, 6 ва 12 айлыкъ болжаллар ва болжаллагъа гёре де башгъа-башгъа къошум процентлери токъташдырылгъан.