Хасавюрт районну ёлбашчысыны биринчи орунбасары Багьавдин Мамаевни ёлбашчылыгъы булан бугюн районну жамият-экономикасыны оьсювюне ва юртланы онгарывгъа бакъдарылгъан алдынлы проектлени яшавгъа чыгъывуна байлавлу жыйын оьтгерилген.
Бизге билдиреген кюйде, жыйынны барышында районну ёлбашчысыны орунбасары Нурулла Муртазалиев чыгъып сёйлеген ва районну жамият-экономика гьалын суратлагъан. Шону булан бирге ол районда налог жыйыв булан тувагъан четимликлени, топуракъ масъалаланы ва капитал къурулушланы масъаласын гётерген.
Район администрацияны пресс къуллугъу билдирген кюйде, жыйында югъагъан аврувланы масъаласына да къаралгъан. Демек, юртларда югъагъан аврув булан гьалны, оларда тазалыкъ болдурувну ва коронавирусгъа къаршы вакцина этивню гьакъында да сёз юрюлген.
