Хасавюрт районну медицина къуллукъчулары вакцина этдире

27 февраля 2021 в 23:56 87
Хасавюрт районну медицина тармагъыны къуллукъчулары оьзлеге коронавирус аврувгъа къаршы вакцина этдиривню бугюн де узатгъанлар. Бизге билдиреген кюйде, вакцинаны районну  бёлюк больницаларыны ёлбашчылары ва къуллукъчулары этдирген.

Хасавюрт район больницаны баш врачы Шамил Минатуллаевни пикрусуна гёре, врач – савлукъ сакълавну башында тургъан адам ва коронавирусгъа къаршы вакцинаны этдирив - медицина къуллукъчулагъа оьзлеге де, олар багъагъан аврувлагъа да герекли чара. Неге тюгюл, вакцина оланы савлугъун да, аврувланы да савлугъун да сакъламагъа кёмек эте.

«Бизин врачлар, республикада алдынлылардан болуп, вакцинаны этдирип башлады, -- дей Шамил Минатуллаев. - Шо районну халкъына да инамлыкъ берди ва олар гёнгюллю кюйде врачланы артына тюшдюлер. Мени оьзюмню айланамдан, ювукъ адамларымдан шо аврув авур гетди, гечингенлер де болду. Шо якъдан алгъанда, Дагъыстанны ёлбашчысы Сергей Меликов да белгилеген кюйде, тезлик булан халкъгъа вакцина этилип битсе, аврувну токътатмагъа болажакъбыз».

Шамил Минатуллаев билдирген кюйде, вакцина этдирив – пачалыкъны оьз ватандашларыны савлугъун сакълавгъа этген аслу чара. Бугюн гьар ватандашгъа, гьавайын вакцина этдирип, оьзюню савлугъун да якъламагъа, югъагъан аврувну яйылывун да токътатмагъа имканлыкъ бар.