Хасавюрт районда вакцина этив генглеше

2 февраля 2021 в 23:01 82
Хасавюрт районда ватандашлагъа коронавирус аврувгъа къаршы вакцина этив генглеше. Артдагъы гюнлерде район больницагъа дагъы да 200 доза вакцина етишдирилген.

Районну пресс къуллугъу билдиреген кюйде, вакцина этдирмеге билим берив ва медицина тармакъларыны, ич ишлер бёлюкню, къыставуллу гьаллагъа къарайгъан ва от тюшювню алдын алагъан къуллукъланы ишчилери гёнгюллю кюйде гелелер. Вакцина этдирмеге сюегенлени терапевт тергей, олардан тарыкъ анализлер алына, эгер де ватандашгъа вакцина гери урулмагъан буса, вакцина этмеге сонг ихтияр бериле.

Район больницаны баш врачы Шамил Минатуллаевни сёзлерине гёре, вакцина коронавирус аврувдан умуми кюйде къоркъунчсузлукъну болдурувгъа бакъдырылгъан ва шо бугюнге биргене-бир къоркъунчсуз къайда болуп токътагъан.

«Вакцина этив ватандашланы савлугъун болдурмакъ учун лап да агьамиятлы чара» -- деп къоша Шамил Минатуллаев.

Коронавирусгъа вакцина этив савлай Россияда декабр айны 18-ден тутуп башлангъан ва вакцина ватандашлагъа гёнгюллю кюйде этилегенни эсгермеге сюебиз.