Хасавюрт район администрациясыны артдагъы генгеши янгы адам гюч булан толумлашдырмакъ учун ватандашланы асгерге чакъырылывуна багъышланды. Шонда сёйлей туруп ерли администрацияны башчысы Арсланбек Алибеков районну халкъы Россияны Президенти В. Путин тутгъан ёл тюз экенни оьтгерилген уллу жыйын да гёрсетгенни айтды. Шону булан бирге ол бир-бир юрт администрацияланы башчылары тындырыкълы кюйде англатыв ишлени юрютмейгенни эсгерди. Шо ишлени военкоматны къуллукъчулары булан тыгъыс байлавлукъда юрютме герекни айтды.

Генгешде сёйлей туруп, районну башчысыны орунбасары Имампаша Бакиев асгерге чакъырыв низамлы юрюлегенни айтды.
Генгешден сонг биз И.Бакиев булан ёлукъдукъ.

– Хасавюрт районда асгерге чакъырыв толу кюйде юрюле, – дей И.Бакиев. – Ери гелгенде айтып къояйым, шагьардагъы военкоматгъа Хасавюрт райондан къайры, Хасавюрт шагьарны ва Новолак районну ватандашлары да чакъырыла. Чакъырыв башланып оьтген 13 гюнню ичинде Хасав­юртну бирлешген военкоматындан 92 адам оланы гьазирлейген пунктлагъа йиберилген, шондан 63-евю – бизин райондан. Хасавюрт районда чакъырыв комиссия къурулгъан ва шону башчысы этилип муниципал къурулувну башчысы белгиленген.

Биз гьар гюн жыйылабыз. Районну башчысы Арсланбек Алибеков не иш этме герекден къайры да, юртларда англатыв ишлер нечик юрюлегенни, чакъырылгъанланы агьлюлерине кёмек этилегенни, олар баргъан пунктларда яшаву-ашаву гьакъда сорай. Биз де гьалны толу кюйде билебиз ва тарыкълы буса, кёмегибизни этебиз.

– Асгерге чакъырывну башында англавсузлукълар кёп болду, дагъы болмасын деп не ишлер этиле?

– Озокъда, адамны асгерге чакъыргъанча англатыв ишлени этген бусакъ, шолар да болмас эди. Гьали шо иш ёрукълашгъан. Бары да зат яхшы, повестка алгъан адам военкоматгъа геле ва тергевден чыгъа. Шонда асгерге чакъырыламы яда заманлыкъгъа къоямы – белгили бола. Яшланы тахшагьардагъы военкоматгъа район администрацияны транспорту булан етишдиребиз, оланы барысына да тарыкъгереги булангъы пакетлер тапшурабыз, шолай да, яшлар уьйренмек учун баргъан ерлер булан байлавлукъдабыз. Гьали тезде олар дав этивню сырларын уьйренеген асгер бёлюклеге барма ва оланы яшав гьалларын билме де сюебиз. Айтагъаным, Хасав­юрт районда асгерге чакъы­рыв ишлер гёрсетилген кюйде юрюле.