Иш сапары булан Хасавюрт районгъан гелген Халкъара жамият палатасыны вакиллери, эсгерилген жамият къурумну ёлбашчыларыны бириси Александр Ольшевский, скульптор, суратчылыкъны Россия Академиясыны академиги Салават Щербаков ва «Дагъыстанны оьзденлери» деген жамиятны ёлбачысы Керимхан Умаханов районну ёлбашчысы Жамбул Салавов булан болгъан ёлугъувдан сонг, рейхстаггъа байракъ къакъгъан къагьруманыбыз Абдулгьаким Исмаиловну ата юрту Чагъаротаргъа сапар чыкъгъанлар.
Бизге билдиреген кюйде, делегация Россияны Игити Абдулгьаким Исмаиловну къабуруну уьстюне чыкъгъанлар, ону атын юрютеген Чагъаротардагъы орта школагъа ва Игит яшагъан уьйде ону эсделигине къурулгъан музейге баргъанлар.
Школада къонакъланы исси къаршылагъанлар, охувчу яшлар Игитни гьакъында язылгъан шиъруланы охугъанлар.
Абдулгьаким Исмаиловну музейинде делегация Игитни суратлары, ол къоллагъан уьй алатлар, кёп санавдагъы суратлар булан таныш болгъанлар. Къонакълар уллу агьамиятлыкъ булан 82-нчи атышыв дивизияны сурат альбомуна къарагъанлар. Ондагъы кёбюсю суратлар уллу къоччакълыкъ гёрсетген белгили разведротагъа багъышлангъан.
Белгили кюйде, эсгерилген ёлдашлар рейхстаггъа байракъ къакъгъан уьч къагьрумангъа: Абдулгьаким Исмаиловгъа, Алексей Ковалевгъа ва Леонид Горычевге эсделик салмагъа сиптечилик булан чыкъгъанлар ва шо эсделик игитлени гиччи Ватанында салынажакъ деп къаравуллана.
