9-нчу майда Каспийск шагьарны баш майданында Уллу Уьстюнлюкню 78 йыллыгъына багъышлангъан асгер парад оьтгерилди. Парадда давну ва загьматны ветеранлары, Украина бойда юрюлеген хас асгер гьаракатны ортакъчылары, сыйлы къонакълар, аталары ва уллаталары давларда болгъанланы наслулары ва яш асгерчилер ортакъчылыкъ этдилер.
Парадны башында Къызыл байракълы Каспий флотилияны офицерлери Россияны Пачалыкъ ва Уьстюнлюкню байракълары булан жыйылгъанланы алдындан оьтдю, шо флотилияны командующийи, контр-адмирал Александр Пешков Парадны къабул этди.
Сагьат онда жыйылгъанлар уллу экранлардан таба Россияны Президенти В.Путинни Къызыл майдандагъы сёйлевюне тынглады.
«Мен бугюн аталарыбыз ва уллаталарыбыз Ватанын якълап, атларын данггъа айтдыргъанын бирдагъы да уллу оьктемлик булан эсгеремен, – дей Россияны Президенти В.Путин. – Кёп сан сёгюп, кёп къан тёгюп миллетчиликден арчылгъанбыз.
Бугюнлерде дагъы да бизин Ватаныбызгъа къаршы давлар юрюле, тек биз Донбасны халкъын якълап халкъара террорчулагъа къаршылыкъ билдиребиз. Шону булан дос республиканы да, оьзюбюзню де аманлыгъыбызны болдурабыз. Россия учун гюнбатышда да, гюнтувушда да душманлар ёкъ, биз гележекни парахатлыкъда, рагьатлыкъда ва эркинликде гёрме сюебиз.
Ватанны сакълагъанлар бизин эсибизде, оланы атларын юреклерде сакълайбыз. Бизин булангъы шатлыкъда СНГ-ни ёлбашчылары да ортакъчылыкъ эте. О буса давну ортакъчыларыны игитлигине гьюрмет этегенин гёрсете. СССР-ни халкъы биригип дав этген, шу байрам барына да ортакъ».
Бу йыл Каспийск шагьарда оьтгерилген парадда 800 асгерчи ортакъчылыкъ этди. Оланы арасында ич ишлени къуллукъчуларындан къайры, федерал оьлчевде ишлейгенлер де, гюмрюк къуллукъну ва МЧС-ни, демек, бары да погон юрютеген къуллукъдагъыланы вакиллери бар эди.
– Уллу Ватан давда 200 мингге ювукъ дагъыстанлы ортакъчылыкъ этген, – деди, жыйылгъанланы алдында сёйлей туруп, Дагъыстанны Башчысы Сергей Меликов. – Шолардан 90 минги тюгюл къайтмагъан. Давда ортакъчылыкъ этген гьар дагъыстанлы уьстюнлюкню гюнюн ювукъ-лашдырмакъ учун оьзлени къошумун болдургъан.
Бугюнлерде де минглер булангъы оланы наслулары бизин пачалыкъны гюнбатыш боюндагъы къоркъунчлукъну ёкъ этмек учунгъу хас асгер гьаракатда ортакъчылыкъ этелер. 7 дагъыстанлыгъа Россияны Игити деген оьр ат берилген, къалгъанлары да минглер булангъы орденлер-медаллар къазангъан.
Майдандан аягъын къатты уруп 800 асгерчи оьтгенден сонг, арты булан асгер техника да юрюдю. Шондагъы гьалиги техниканы арасында дав йыллардан берли белгили «Катюша» машин де бар эди.
