Къардаш театр – къонакълыкъда

Сентябр айны 27-синде Дагъыстанны маданият министерлигинде газетлени ва телевидениени журналистлери булан ДР-ни маданият минис­т­ри Зарема Бутаева прес-конференция оьтгерди. Бу ёлугъувгъа аслу себеп – Хакасиядан бизин рес­публикагъа биринчилей гелген къона­кълар болду. Министр инг башлап жы­йылгъанланы къонакълар булан таныш этди. О – «Читиген» деген Хакасияны драма ва халкъ макъамларыны театрыны коллективи. Театрны директору – Ирина Чустугешева, чебер ёлбашчысы – Валерий Топоев.

Олай да ёлугъувда Дербентдеги Дагъыстанны театр чалышывчуларыны союзуну председатели, Россияны халкъ артисти Айгум Айгумов, Азербайжан пачалыкъ драма театрыны директору Фирдоуси Аскеров, режиссёру Якъут Хандадашева ортакъчылыкъ этди.

З.Бутаева оьзюню сёйлевюнде Хакасияны театры Дагъыстангъа Россияны маданият министерлигини «Большие гастроли» деген Бютюнроссия программасыны оьлчевюнде гелгенни гьакъында айтды. Дагъыс­танда олар сентябрни 27-синде Къумукъ музыкалы-драма театрда биринчилей спектакль гёрсетежек.Сонг Азербайжан театрыны чакъырывуна гёре Дербентде, лезги театрны сагьнасында спектакллер гёрсетежек. Олар «Ахол» ва «Хубай – гьавчуну уланы» деген спектакллерден къайры да, «Чолпан Чылтыс» (Эртенги юлдуз) деген фольклор программасын да гёрсетежек.

Хакасияны театрыны директору И.Чустугешева ва театрны чебер ёлбашчысы В.Топоев оьзлени сёйлевлеринде театрны тарихини гьакъында хабарлады. Россияны гьар тюрлю регионларында ва тыш пачалыкъларда болуп спектакллер гёрсетгенни, къаравчулар айрокъда Хакасияны халкъыны тарихини ва гьалиги яшавуну гьакъындагъы спектакллени кёп сююп къабул этегенни гьакъында айтды.

Дагъыстанны театр чалышывчуларыны союзуну правлениесини председатели Айгум Айгумов да оьзюню сёйлевюнде Россияны кёп миллетли халкъларын бирикдиреген булай ёлугъувлар, айрокъда Украинада хас гьаракат юрюлеген вакътиде бек тарыкълы ва пайдалы экенин айтды.

– Бизин Дагъыстангъа Россияны гьар тюрлю республикаларындан, регионларындан театрлар геле, оьзлени спектакллерин гёрсете, бизин спектакллеге къарай. Шоллукъда, дос аралыкълар тувулуна. Хакасия театры бизге биринчилей геле. Биз энниден сонг сизин булан дос аралыкълар юрютме болажагъыбызгъа бек шатбыз. Дагъыстанда 14 миллетни театрлары иш гёре, шонча газетлер ва журналлар чыгъа. Расул Гьамзатов Дагъыс­тангъа гиччи ООН дей эди. Шолай дюр де дюр. Дослукъда, бирликде яшамакъны бизге бырынгъы ата-бабаларыбыз варисликге къоюп гетген. Шолай, бирдагъы бир сизин республика Хакасия булан да дослукъда, бирликде яшажакъгъа шеклик этмеймен, – деди А. Айгумов.

Ахырында журналистлер берген соравлагъа да къонакълар кёп сююп жавап­лар къайтарды.

Авторизация
*
*
Регистрация
*
*
*
Согласны с условиями сайта?
Генерация пароля