Ишлени машинлешдиривню натижасы

Топурагъындан эсе таву-ташы кёп, чет шартлары булангъы Дагъыстанда яшайгъан халкъланы яшавлукъ-коммунал къуллукъларын кютювден хантав къалмагъа ярамай. Шону учун бизин республикабызда «Мени Дагъыстаным – мени ёлларым», «Мени Дагъыстаным – мени сувларым, «Онгайлы шагьар шартлар учун» ва шолай оьзге тюрлю агьамиятлы проектлер пайдаландырылагъаны натижаларын бермей къоймай.

Эсгерилген проектлер булан янаша арт вакътилерде бизин республикабызны муниципал къурулувларында «Газ тартывну енгиллешдиривню гьакъында» деген пачалыкъ программаны талаплары да тергевсюз къалмай. Шолайлыкъда, арадан оьтген тогъуз айны ичинде Дагъыстанда яшав шартлары осал 2500 -ге ювукъ къоллавчулагъа онгайлы табии газ ягъарлыкъ гелтирилген.

– Савлай Дагъыстанда къоллавчуланы уьйлерине ва шолай да айрыча къурумлагъа толу кюйде табии газны гийиривге байлавлу болуп 2030-нчу йылгъа ерли хас программа къурулгъан ва пайдаландырывгъа берилген, – деди бугюнлерде республикабызны маълумат къуралларыны къуллукъчуларына берген баянында «Газпром газораспределение Махачкала» деген компанияны башчысы Ленар Мансуров. – Алгъа салынгъан борчланы белгиленген болжалларында толу кюйде яшавгъа чыгъарыв, озокъда, ишлени машинлешдирив булан тувра байлавлу. Шону гьисапгъа алып, бизин компанияны техника базасын беклешдиривге де тийишли тергев бакъдырыла. Айтмагъа сюегеним, бугюнлерде бизин техника базабыз дагъы да 9 янгы хас авур юклени ташый­гъан машинлер, авур юклени гётереген кранлар ва шолай да, адамланы алып юрюйген янгы «Газеллер» булан толумлашды.

Гертиден де, къоллавчуланы уьйлерине табии газ ­ягъарлыкъны гелтиривге байлавлу болуп оьтгерилеген ишлени машинлешдиривню натижасында борчлар йырылмай, сан яны булан яшавгъа чыгъарыла. Шо да газчылар учун къоллавчуланы разилигин къазанмагъа имканлыкълар ярата.

Дагъыстанлы къоллавчуланы къуллукъларын кютюв булан машгъул болагъан ихтиярлары дазуландырылгъан акционер жамият «Газпром межрегионгаз Махачкала» Россияны бары да регионларында иш гёреген «Газпром межрегионгаз» деген гюплени бир бёлюгю экени гьакъда да айрыча эсгерме тюше.
Эсгерилген пачалыкъ программаны яшавгъа чыгъармакъ учун акъча маялар кёмек гьисапда аслу гьалда федерал бюджетден айырыла.

Бугюнлерде шолай ­енгилликлерден биринчи гезикде Дагъыстанны тав районларында яшайгъан къоллавчулар пайдалана. Шолайлыкъда, тав ра­йонларда яшайгъан ватандашлагъа онгайлыкъланы болдурув булан юрт ерлерден шагьарлагъа ва тюзлюкдеги районлагъа башалман кюйде гёчювню алдын алма умут этиле.

Авторизация
*
*
Регистрация
*
*
*
Согласны с условиями сайта?
Генерация пароля