Ишчи сапар...

«Солакъ каньон» туристлер учун – Дагъыстанда инг де белгили ер. Гетген йыл шогъар къарамагъа ре­с­пуб­ликагъа 200 мингден де къолай адам гелген. 53 чакъырым ва теренлиги 1920 метр гелеген къысыкъ кёп къонакъланы тергевюн тарта.

Июн айны 1-нде ре­гион­ну Башчысы тюш болгъанча «Солакъ каньонда» болду. Ол 100 квадрат метр ерде ерлешген, гьайран гёрюнюш береген майданчада болду ва гелген къонакъланы къуллукъларын кютеген имканлыкълар болдурмакъны айтды. Шолай да, шу бойда вертолётлар къонагъан майданча да этилежек.

* * *
Къазбек райондагъы «Глав­рыба» деген экотуркомплексни янында туристлер учун «Нохъо» деген анакъ ачылды. Шону ачылывунда Дагъыстанны Башчысы Сергей Меликов ва Дагъыстанны Халкъ Жыйыныны председатели Завур Аскендеров, Пачалыкъ Думаны депутатлары ортакъчылыкъ этди.

«Нохъо» деген анакъ 1970-1980-нчи йыллардан берли белгили, тек ону туристлеге тамаша болажакъ деп гьали ачгъан. Шо ерге – «Солакъ каньонну» инг де тар еринде, эки де ягъаны байлайгъан аякъ кёпюр салынгъан.
* * *
Дагъыстанны Башчысы Сергей Меликов шо гюн, «Главрыба» деген экотуркомплексде оьтгерилеген ва Яшланы халкъара гюнюне багъышлангъан фестивальда да ортакъчылыкъ этген. Ол яшланы байрамы булан къутлагъан.

–Яшлыкъ тез гетип къала, арадан бираз заман гетип сиз охуп битерсиз, студентлер боларсыз. Бирлеригиз буса бугюнлерде асгерчилер хас операцияда ортакъчылыкъ этегенде йимик, Ватанны сакълавчулары боларсыз, къай­да болсагъыз да, аманат болугъуз, – деген ол.

Шу фестивальны юрюшюнде Сергей Алимович татавулда батылып барагъан яшны оьлюмден къутгъаргъан Патимат Гарушевагъа Баракалла кагъыз ва савгъат тапшургъан.
Шо чаралардан сонг ол дагъыстанлы далапчылыкъ юрютегенлер булан ёлугъув оьтгерген.
* * *
Июн айны 2-синде Дагъыс­танны Башчысы С.Меликов Къарабудагъгент районда болду.

Биричилей ол Къурбуки юртдагъы «Союз» деген хозяйствогъа барды. Бу хозяйствогъа 28 абзаръягъа ва 1 сабанчы хозяйство гире. «Союз» 20 миллион манат харжлап яшылчалар сакълама болагъан ер этген. Хозяйствону башчысы Магьамматзакир Ибрагьимов айтагъан кюйде, тезде шу бойда 3 минг тон емишни ишлетеген , гьатта къурутагъан цехлер, заправкалар ва къонакъ гелгенлеге турма къонакъюй де этме гёз алгъа тутулгъан.
* * *
Оьзюню ишчи сапарында Сергей Меликов муниципалитет къургъан «Волна» деген адамлагъа киринмеге имканлыкъ береген ерге де къарагъан.

– Шулай ерни биз район­гъа туристлени тартмакъ учун этебиз, – дей районну башчысы Магьмут Амиралиев. – Къурулуш ишлеге 7,5 миллион манат харжлангъан, шолай да туризмни министерлигине конкурсда ортакъчылыкъ этме арза берилген.
* * *

Денгиз ягъадагъы «Кас-пий» деген санаторийни янында «Каспий-Марина» ва «Аль-Каср» деген турист-комплекслер къурулма башлагъан.
Сергей Меликов шо къурулушланы макетине ва этилинген ишлеге агьамият берип къарады.

«Каспий–Марина» 7160 кв.м. ерде къурулажакъ ва 400 адам ял алып болар кюйде 6 тогъузар къабатлы биналар къурулажакъ. Абзар боюнда буса гелгенлер учун бары да имканлыкълар яратылажакъ. Бугюнлерде ишлеге 1 миллиард манат салынып битген.

«Аль-Каср» деген комплексде 450 ер болажакъ, олар ишлени юрютюп тура ва 2025-нчи йылда ишге салма хыял бар.
* * *
Артдагъы вакътиде «экотуризм» деген сёз арагъа чыгъып тура. Шо буса иш къурумланы ишлейген кююне къарамагъа, табиатны аривлюгюне ва ял алмакъ учун этиле. Шолай ер Къарабудагъгент районну «Герей-Тюз» деген агрофирмасында къурулгъан.

Агрофирманы Канзитдиновланы агьлюсю юрюте. Бу хозяйство юзюм болдуруп ишлей. Оьтген заманны ичинде агрофирма 1,5 минг тон юзюм ишлетип болагъан чагъыр завод этген. Йылда 500 минг шиша чагъыр гьазирлей.

Юзюмню гелими гьар гектардан 130-190 центнер бола. Оьтген йылда агрофирма 44,8 миллион манатны къадарында 2260 тон юзюм болдургъан.
Сергей Меликов тарыкъ­лы министерликлеге пайдалы ишлейген агьлюге бо­лагъан кёмекни этмекни тапшургъан.
* * *
Шолай да, Сергей Меликов Къарабудагъгент районну Жанга деген юртундагъы 120 яшгъа ери булангъы яшлар бавуну къурулушуна къарагъан, Гюбден юртдагъы маданият къалада ишлейгенлер булан лакъырлашгъан, Дёргелидеги 200 яшгъа ери булангъы яшлар бавуну гьазирлигин тергеген. Шо яшлар баву 1-нчи сентябргъа ишге салынма герек.


Бизин мухбирибиз.

ФОТО: ПРЕСС-СЛУЖБА ГЛАВЫ РД