Игитлик унутулма ярамай…

2-нчи сентябрде республикада, оьзлени борчларын кютегенде жанын къурбан этгенлеге ба­гъышлангъан «Эсде сакълайыкъ» деген чараны биринчи бёлюгю башлана. Шо буса савлай уьлкеде террорчулукъгъа къаршылыкъ билдиривню юрек бирлигине багъышлана.

 

Дагъыстанны маълумат ва печат министерлигинде оьтгерилген ва шо агьвалатгъа багъышлангъан чарада ДР-ни билим берив ва илму министерлигине «Дагъыс­танлылар-Россия Федерацияны Игитлери» деген плакатланы тапшурду.

– Мен шу Игитлени плакатларын онгара туруп, гьарисини къысматыны гьакъында билдим, оланы кёбюсю бираз сакълангъан буса, сав да къалар эди, тек олар тартынмагъан, адамланы аманлыгъын сакълап, жинаятчылар булан бетге-бет тургъан, кёбюсю жанларын къурбан да этген, – дей ДР-ни маълумат ва печат министри Умаросман Гьажиев. – Биз шо игитлени атларын унутмай эсде сакълама герекбиз. Игитлени атларын оьсюп гелеген яшлагъа, олагъа да оьзлени авлетлерине етишдирмек учун, муна шулай чаралар кёп оьтгерилме герек. Бугюн биз школалагъа 700 плакат беребиз. Ювукъ арада «Дагъыстанлылыр – Советлер Союзуну Игитлери» деген плакатлар ва шолай атлары булангъы китаплар да гьазир этежекбиз.

Плакатланы къабул эте туруп, ДР-ни билим берив ва илмуну министрини борчларын заманлыкъгъа кютеген Ягьия Бучаев Умаросман Гьайбуллаевичге баракалла билдирди, плакатдагъы яшланы кёбюсюн таныйгъанны ва халкъны аманлыгъы учун дюньяда инг де аявлу жанын бергени саялы оланы эсделигине абур-сый этип турма герекни айтды.

Оланы игитлиги гьакъда школаларда айрыча дарслар юрютме, шолай уланланы тарбиялагъан ата-аналар булан ёлугъувлар оьтгерме борчлубуз. Шо чаралар яшёрюмлени тарбиялавда айрыча ер тутагъанны да унутма ярамай.

Авторизация
*
*
Регистрация
*
*
*
Согласны с условиями сайта?
Генерация пароля