Игит лётчик Юсуп Акаевни эсге алды

Буйнакск шагьардан ва райондан эл макътагъан адамлар кёп чыкъгъан. Оьзюню къагьруманларын, алимлерин ва гьюрметге лайыкълы адамларын халкъ унутмай.

Олай айтагъаным – август айны 14-нде Буйнакск шагьарда кёп халкъны ортакъчылыгъы булан Совет Союзну Игити къарчыгъа ругьлу лётчик Юсуп Акаевни эсделигине багъышланып уллу жыйын болду. Бу агьвалат денгиз авиацияны тенгсиз батыр уланына онгайлы ерде ясалгъан памятникни алдына юрюлдю. Эртен чакъда гелген асгерчилени эки-уьч сыдырасы тизилип токътагъан кюй гёзге нече де арив тие эди. Олар булан аралашып охувчу яшлар, яш асгерчилер де токътагъан эди.

Гьюрмтели къонакъланы арасында Дагъыстанны Гьукуматыны, савлукъ сакълав министерлигини ва милли политиканы ва ругьани ишлени министерлигини вакиллери де бар эди. Оьзю Ю.Акаевни тухум-тайпасындан да хыйлы ёлдашлар жыйында кёп сююнюп ортакъчылыкъ этдилер.

Жыйылгъанлагъа хош-беш этип сёзюн башлай туруп, шагьарны баш гьакими Исламутдин Нургьудаев Юсуп Акаевни ва огъар ошагъан оьзге игитлени халкъ унутмайгъанны эсгерди. Юсуп Акаевни аты шагьардагъы школагъа, дав макътавлугъуну музейине, ДОСААФ-ны школасына ва орамланы бирисине къоюлгъанын малим этди.

Жыйында Дагъыстан Республиканы Гьукуматыны Председателини заместители Муслим Телякъавов, Дагъыстанны савлукъ сакълав министри Татьяна Беляева, давну ветеранларыны Бютюнроссия къурумуну Дагъыстандагъы бёлюгюню председатели Магьарам Алижанов ва оьзге ёлдашлар жыйылгъанланы алдына чыгъып сёйледилер. Юсуп Акаев Ватанына, халкъына гьалал къуллукъ этип оьрлюк къазангъан къоччакъ уланланы лап гёрмеклилерини бириси экенни айтдылар.

Ю.Акаевни къызыны къызы Разия Шихсайитова оьз тухумуну атындан чыгъып сёйлей туруп, бу ишни этмеге ойлашгъанланы ва арив этип яшавгъа чыгъарагъанланы барысына да баракалла сёзлер багъышлады. Оьзюню уллатасы ватанын якълап къагьруман йимик ябушгъанны, саламат ва сав кюйде яшагъанны гьакъында мисаллар эсгерип хабарлады.

Эсгерилген жыйынны ортакъчылары бир минут шып болуп токътады, шо мюгьлет, адатлы кюйде, автоматлар булан оьрге атышдылар. Бу да эсге алывну токъташгъан бир мердеши бола.

Сонг жыйылгъанлар гезик булан барып Юсуп Акаевни эсделигини ал бетин тюрлю чечек байламлар салып арив торладылар.

Авторизация
*
*
Регистрация
*
*
*
Согласны с условиями сайта?
Генерация пароля