Гьали гьалилерде ДР-ни Башчысыны борчларын заманлыкъгъа кютеген Сергей Меликов яшавлукъ-экономика масъалалалагъа байлавлу болуп регион учун лап да агьамиятлы масъалалар булан Россияны Президенти В. Путинни ва РФ-ни юрт хозяйство министри Дмитрий Патрушевни таныш этген. Лакъырлашывларда гётерилген масъалалагъа гёре тийишли къурумланы ва тармакъланы башчыларына тапшурувлар берилген ва жаваплы адамлар да белгиленген.
Дагъыстан аграр республика гьисапда танывлу. Бизин республикабызда умуми ич продуктну 25 процентге ювугъу агропромышленный тармакъда чалышагъанланы гьаракаты булан амалгъа геле. Мекенлешдирип айтгъанда юрт хозяйствобузну гьар тюрлю тармакъларында алдагъы йыл 40 миллиард манатдан къолай оьлчевюнде авлакъ ниъматлар ва шолай да гьайванчылыкъ продукталар болдурулгъан.
Озокъда, шону булан дазуланмагъа бажарылмай. Неге десегиз, Дагъыстанда юрт хозяйство топуракъланы асувлу кюйде къоллавну масъалаласы ойлашдыра.
Шогъар байлавлу болуп артдагъы гюнлерде «Дагъыстан» деген телерадиокомпанияда ДР-ни Гьукуматыны Председателини заместители Абдулмуслим Абдулмуслимов республикабызны маълумат къуралларыны юрт хозяйство тармагъы гьакъда язагъан журналистлеге баянлыкъ берген сонг, гьар тюрлю соравлагъа толу кюйде жаваплар да къайтарды.
Сергей Меликовну Владимир Путин ва Дмитрий Патрушев булан болгъан гьакълашывларында Дагъыстанны темиркъазыкъ боюндан таба басып гелеген къайырчакъланы алдын алывгъа ва шолай да сугъарыв ишлени генглешдиривге тергевню гючлендирмесе бажарылмайгъаны айтылгъан. Неге тюгюл, белгили себеплеге гёре минглер булангъы гектарларда къайырчакълар артып тура. 100 минг гектардагъы юрт хозяйство агьамияты булангъы топуракъларда сугъарывну имканлыкълары асувлу кюйде пайдаландырылмай. Шону учун пачалыкъны янындан харж кёмек тарыкъ болажакъ. Федерал ва республика программаларда гёрсетилинген харжланы да тёкмей-чачмай къолламагъа таклиф этилине.
Бизин республикабызны юрт хозяйствосунда мердешли тармакълар саналагъан юзюмчюлюкню, къойчулукъну, бавчулукъну ва шолай да балыкъчылыкъны оьсдюрюв аслу борчлардан болуп токътай.
Озокъда, экономиканы оьсювю булан ватандашланы, ерли халкъны яшавлукъ шартларын яхшылашдырыв да амалгъа гележеги гьакъ. Шону гьисапгъа алып, артдагъы йылларда юрт ерлерден шагьарлагъа, тавлардан тюзлюк бойлагъа, гёчювюл гьайванчылыкъны топуракъларына-отлавлукълагъа башалман кюйде юрюлюп турагъан гёчювюлню алдын алмакъ учун тийишли чараланы гёрмеге заман болгъанны гьакъда да Абдулмуслим Мугьутдинович айрыча эсгермей болмады.
Шолайлыкъда, республикабызны агропромышленный тармагъында гелимлени дагъы да артыдырма болажагъы шекликни тувдурмай.
