Уллуланы хантавлулугъундан, гьайсызлыгъындан яшлар да заралланагъан гезиклер аз болмагъан. Айтагъаным, бир нече гюн алда Магьачкъаладагъы Новокаякентский орамдагъы къаравсуз къалгъан бош уьйню ичинде газ атылгъан. Чалтлыкъда яйылып гетген ялындан уьйню ягъындан оьтюп барагъан эки 12-13 йыллыкъ яшланы санлары аявсуздан бишип, республика больницаны «Ожоговый центрына» тюшген эди.

 

Алдагъы гюн Дагъыс­танны савлукъ сакълав министри Татьяна Беляева оьзюню заместители Райиса Шахсинова булан бирче шо яшланы гёрмеге баргъан.

Татьяна Беляева «Ожоговый центрны» ичинден айланып, яшланы гьалын, олагъа медицина якъдан нечик кёмек этегенин, не дарманланы къоллайгъанын тергеген.

Эки де яш эсгерилген центрны реанимация бёлюгюнде авур кююнде яталар. 12 йыллыгъыны къаркъарасы 55 процентге, 13 йылыкъ чагъындагъы яшны буса 45 процентге бишген деп токъташдыргъанлар.

Дагъыстанны савлукъ сакълав министри Т. Беляева оланы савлугъуну даражасына байлавлу федерал центрланы айтылгъан касбучулары булан лакъыр этип, насигьатлар алгъан.

–Биз гьали яшланы къы­йынлы гьалындан чыгъармакъ учун бары гючюбюзню салып, имканлыкъларыбыздан пайдаланып къасткъылабыз. Олагъа экевюне де Россияны савлукъ сакълав министерлигини таклифлерине гёре, тийишли кюйде дарманлар этилине,–деп билдирди Т. Беляева. –Яшланы аякъгъа салмакъ учун тарыкълы дарманлар этиле. Врачлар аста-аста булан, бир-бирлетип оьзге яхшы къайдалагъа гёре де аврувланы багъалар. «Ожоговый центрдагъы» бары да имканлыкъланы пайдаландырып гьаракат этелер.

Уьстевюне, яхшы сынаву булангъы врачлар оланы уьс­тюнден таймай тергейлер. Биз бугюн де видео байлавлукъ булан Нижний Новгороддагъы Приволжский ахтарыв медицина университетни «Ожоговый центрыны» директору Игорь Арефьев ва А. Вишнёвскийни атындагъы милли медицина ахтарыв хирургия центрыны ожоговый центрны приём-диагностика бёлюгюню заведующийи, медицина илмуланы доктору Александр Бобровников булан да гьакълашдыкъ. Айтылгъан касбучулар белгилеген кюйде, бизин яшлагъа башындан тутуп, федерал центрларда да къоллана­гъан къыйышывлу дарманлар этилинген. Оланы таклифлерин де гьисапгъа алып, бизин врачлар къолундан гелеген кёмекни этелер,–деп билдирди министр.

Дагъыстанны савлукъ сакълав министерлигини касбучулары да ортакъчылыкъ этип, яшланы савлу­гъуну гьалы заман-заман монитор къайдалы къаравлардан чыгъа. Ондан къайры да, Дагъыстанны савлукъ сакълав министри Т. Беляева эки де яшны оьзюню тергевлерини тюбюнде сакълай.