1-нчи июн –Яшланы якълавну халкъара гюню
Гьар абатыгъыз яхшылыкълагъа алынсын!
Яш бар уьйде ялкъыв ёкъ дейлер. Гертилей де, ата-ана учун яшдан уллу сююнч болмай. Ону алгъан биринчи абатларындан сююнюп, гьар къайсыбыз да яхшылыкълагъа алынсын, оьрлюклеге элтеген ёллагъа басылсын деп алгъыш этилегени де, олай да яшны яшавунда болагъан гьар къайсы гьалны уллу сююнч булан къаршыланагъаны шо саялы болма ярай.
Айтагъаным, биринчилей бешикге салынагъанын да, биринчи тиш чыкъгъанын да янгыз дос-къардаш тюгюл, авул-хоншу да хадиргюн тувгъанда йимик къабул эте. Билим алмагъа башлагъанда да, шондан сонггъу йылларда да яшны тарбиялав булан бирче ону пагьмуларын арагъа чыгъарывгъа да тергев берилмей къалмай. Шо да негьакъ тюгюл. Яшда уянгъан пагьму да, яшда токъташдырылгъан хасият къылыкъ битими де гележекдеги талайлы яшавуна ёл ача.
Халкъ арада, эл арада яшда уьйрет яшынгны, абурлу этер башынгны деп айтыла гелегени де шону кёп арив исбатлай. Сонг да, яшда ачылгъан пагьму да, чечекленмей, берекетли гелим бермей къалмай.
Шо саялыгъа да сиз, яшлар, гележек яшавну гёз алгъа тутуп, гьаракатны къастын этигиз, яшавугъуз талайлы ва ирисли болсун, яшагъан гюнюгюз яхшылыкълардан толсун деп айтмагъа сюебиз. Гьар йыл да мердешли кюйде июн айны 1-нде белгиленеген Яшланы якълавну халкъара гюню етишип гелегенин гёз алгъа тутуп, шо байрам булан сизин гьакъ юрекден къутлайбыз. Сиз гьар заманда да ата-анагъа тынглавлу, адилли ва эдепли болуп, эл сукъланардай оьсюп уллу болажакъгъа да инанабыз. Пачалыкъны янындан да билим алывгъа, спортну юрек авагъан журасы булан машгъул болмакъ учун да, оьзге пагьмуларыгъызны оьсдюрмеге де имканлыкълар берилген. Шоланы барысын да гьисапгъа алгъанда, сизден янгыз гьаракат этмек къала.
Насрулла БАЙБОЛАТОВ.
Интернетден алынгъан сурат.
