Алдагъы гюнлерде Каспийск шагьарда Али Алиевни атындагъы спорткъаласында «ДагАгроКаспий» деген форум юрюлдю. Эсгерилген форум эки гюн узатылды ва агропромышленный тармакъгъа багъышлангъан эди.
Форумну ачылывунда Дагъыстан Республиканы Гьукуматыны Председатели Абдулмуслим Абдулмуслимов, вице-премьери Нариман Абдулмуталибов, ДР-ни юрт хозяйство ва сурсат министри Мухтарбий Ажеков, ДР-ни промышленност ва сатыв-алыв министри Низам Халилов, «Дагъыстанны теплицалары» деген бирлешивню президенти Арсен Жамалутдинов ортакъчылыкъ этди.
А. Абдулмуслимов Дагъыстан Республиканы Башчысы Сергей Меликовну атындан форумну ортакъчыларына ва къонакълагъа бу чара пайдалы, натижалы болмакъны ёрады ва булай деди:
– «ДагАгроКаспий» форум бизин учун бек агьамиятлы ва Дагъыстанны бютюн агропропромышленный ва оьсюмлюкчюлюк тармакъларына болушлукъ этежегине инанабыз. Бугюнлерде бизин республикада язбашгъы чачыв ишлени алдында форумну оьтгерив юрт хозяйство тармакъны къуллукъчулары учун янгы технологиялар, янгы препаратлар, оьсюмлюклени гьар тюрлю зараллы жанлардан къоруйгъан маллар булан таныш болмагъа, пайдаланмагъа имканлыкъ бере.
Гертилей де, агропромышленностну кёп тюрлю тармакъларындан бавлар ва юзюмлюклер, оьсюмлюкчюлюк, юзюмчюлюк, юрт хозяйство техника ва башгъа малланы 100-ден де артыкъ компаниялар гелтирген эди. Янгы техника, урлукъ, химия, терек ва башгъа тюрлю малларын Темиркъазыкъ Кавказ ва Къыбла федерал округланы регионларындан гелген компаниялар малим этди.
Мисал учун, Темиркъазыкъ Осетиядан гелген «Фундуки Алании» деген фирма чертлевюк тереклер оьсдюре ва 400 гектар ерде чертлевюк баву да бар. Дагъыстанны Сулейман Стальск районунда да 1100 гектар ерде чертлевюк бав орнатылгъан.
Форумда дагъы да Ставрополь крайдан гелген «Сады Ставрополья» деген фирма бар эди. Шону вакили эсгерген кюйде, олар йылда 6 миллион бала терек сата. Олар оьсдюреген гьар тюрлю журалы алма тереклер 20-25 йылны узагъында инг гелимли тюшюм бере.
Эки гюнню узагъында оьтгерилген форумда Дагъыстанны юрт хозяйство тармагъыны къуллукъчуларына ва тышдан гелген компанияланы вакиллерине сынав алышдырмагъа, бу тармакъда янгылыкълар булан таныш болмагъа имканлыкъ болду.
