Эндирей халкъ театры – Къоркъмаскъалада

Эндирей халкъ театры къурулгъанлы 35 йыллар бола тура. Гьар йыл олар сагьнада 2 спектакль сала ва юртлагъа барып гёрсете. Бугюнлерде Эндирей халкъ театрыны артистлери язывчу ва драматург Зарипат Атаеваны «Васият» деген пьесасына гёре салгъан спектаклни къоркъмаскъалалы къаравчулагъа гёрсетди. Спектакль башлангъынча алда ону режиссёру Къурайыш Къонакъбиева булан ёлугъуп, бир нече соравлагъа жавап бермекни тиледик.

– Къурайыш, Эндирей халкъ театрны тарихинден бир-эки сёз айтсагъыз арив болур эди.

 – Эндирей халкъ те­атрыны кюрчюсюн 1988-нчи йылда белгили йырав Латип Шайыпов ва язывчу Гебек Къонакъбиев салгъанлар. 1990-нчы йылда буса бизин театргъа «халкъ театры» деген ат берилген. О йылларда театргъа мен де къуршалдым. Кёп спектакллерде ойнадым. Агьлю масъалалар чыгъып, бир хыйлы йыллагъа театрдан айрылмагъа тюшдю. 2019-нчу йылда театрны ёлбашчысы ва режиссёру Латип Шайыпов театрдан гетген сонг, театрны коллективи режиссёруну ишин мен алгъанны сюйдю. Муна Эндирей халкъ театрына ёлбашчылыкъ этегеним 4 йыл бола.

 – Сагьнада ойнайгъан артистлени касбу билими бармы? Олар кимлердир?

 – Бир артистибизни де театр билимлери ёкъ. Гьар тюрлю ишлерде ишлейген адамлар. Олар барысы да – сагьнагъа гьашыкъ, инчесаниятгъа берилген. Касбу билимлери болмаса да, оланы табиатдан пагьмусу бар. Спектаклге къарагъанда гёрерсиз оьзбашына иш гёреген бизин артист-лерибизни оюнун.

 Эндирей халкъ театрны сагьнадагъы оюнуна, ишине спектаклге гелген къаравчулар герти багьасын берди.
«Халкъ театрны артистлери, оланы оюну, оьзлени сагьнада тутагъан кюю Къумукъ театрны артистлерини оюнундан бир де къалышмай. Къаравчуну спектаклни башындан ахырына ерли къуршамагъа бажара», – дей, артистлени оюнуна багьа бере туруп, Къоркъмаскъала школаны муаллими Нурият Эндреева.
Юртлу гиши Муртазалини ролюн ойнайгъан Сайдулла Дадаевни ва ону гелини акъчагъа сатылып, намус-ягьны унутгъан, къайнатасыны акъчасы урлангъанны эшитгенде, ону къувалап къыргъа чыгъаргъан Кавсаратны келпетин уста кюйде яратма болгъан Къурайыш Къонакъбиеваны гьар тербенишин, гьар сёзюн къаравчулар харс урувлар булан къаршылады.

 Эндирей халкъ театр­ны бары да артистлерини оюну къаравчуланы таза къурчун къандырды.

Жават ЗАКАВОВ.
СУРАТДА: спектаклден сонг артистлер къаравчулар булан савболлаша.

Авторизация
*
*
Регистрация
*
*
*
Согласны с условиями сайта?
Генерация пароля