«Чёлню тавушу» деген ногъай тилде чыгъагъан республика газетини баш редактору Эльмира Кожаева коронавирусгъа къаршы вакцина этивню биринчи тиретинден оьтген: ол къаркъарасында антителаланы барлыгъын билмек учун тарыкъ анализлени берген.
Эльмира Кожаева билдирген кюйде, гетген йылны май-июн айларында редакцияны къуллукъчулары бары да дегенлей шо аврув булан авругъанлар.
«Редакцияны къуллукъчулары, шоланы ичинде мен оьзюм де, авур кюйде аврудукъ. Биз коронавирус аврувну биринчи толкъунуна тюшдюк. Гьакъыкъатда газет чыкъмай уьч жума къалды. Гьали буса, коронавирусгъа вакцина чыкъгъан сонг, къаркъарабызда антителаланы барлыгъын тергемеге, эгер де ярай буса, вакцинаны этдирмеге токъташгъанбыз», — дей Эльмира Кожаева.
Эльмира Кожаеваны сёзлерине гёре, мухбирлер кёп адамланы ортакъчылыгъы булан оьтгерилеген тюрлю-тюрлю чараларда ортакъчыкъ этелер ва шо саялы да вакцина башлап оланы оьзлени ва ювукъ адамларыны къоркъунчсузлугъу саялы тарыкъ.
