Дагъыстанны Башчысы Сергей Меликов Бирлешген Арап Эмиратланы Россия Федерациядагъы элчиси Могьаммат Агьмат аль-Жабер булан ёлукъгъан. Ёлугъувда сенатор Ильяс Умаханов, республиканы премьер-министри Абдулмуслим Абдулмуслимов, Дагъыстанны Гьукуматыны членлери ва Халкъ Жыйыныны вакиллери де ортакъчылыкъ этген ва Дагъыстан Республиканы да, бу арап уьлкени де арасындагъы гележекде бирче иш гёрювню масъалаларына къаралгъан.

Бир башлап Сергей Меликов къонакълагъа республикагъа сапары учун баракалла билдирген. «Биз бугюн Дагъыстанны ва Бирлешген Арап Эмиратланы къатнашып иш гёрювюне разилик билдиребиз. Бугюнгю ёлугъув­ да къатнашывланы бары да янларына дегенлей янгы гюч бережегине инанаман. Бизин арабыздагъы сатыв-алыв, экономика ара­лыкъланы гележеги бар эке­ни бек агьамиятлы. Гележекде де шолай аралыкълар дагъы да яхшы юрюлер деп эсиме геле», – деп билдирген регионну ёлбашчысы.

Сергей Меликов бирдагъы эсгерген кюйде, 2022-нчи йылны январ айында «Лезгинка» ансамбли Эмиратларда болгъан. Олар Дубай шагьарда оьтгерилеген «ЭКСПО-2022» деген Бютюндюнья выставканы Россиягъа багъышлангъан маданият программасында ортакъчылыкъ этген.

Бирлешген Арап Эмиратланы Россиядагъы элчиси Могьаммат Агьмат аль-Жабер ёлугъувну вакътисинде айтгъан кюйде, бизин пачалыкълар хыйлы йылланы къуршап къурулгъан дыгъарлагъа гёре политика, экономика ва гуманитар тармакъларда бирче иш гёрювню ёлларында юрюй. Эки де уьлкени арасындагъы сатыв-алывну оьлчевлери гетген йыл 5 миллиард доллардан къолай болгъан.

«Кёплер Дагъыстанны маданият ва инчесаният байлыкъларына гёре Темиркъазыкъ Кавказны инг гёзел ери деп гьисап эте. Гертилей де, регион гёзел табиаты, бырынгъы тарихи эсделиклери булан белгили. Дагъыстан башгъа-башгъа динлени юрютеген, гьар тюрлю миллетлер къыйышып яшайгъаны булан да тергевню тарта. Россия — тамаша болардай оьзтёрече ер. Бизин пачалыкълар шо янындан бир-бирине ошашлы. Эмиратларда Россиядан гелгенлер кёп бар. Дагъыстандан гелгенлер де ёлугъа. Олар бизин пачалыкъны оьзлени экинчи ватаны йимик гёре», – деп билдирген элчи.

Могьаммат Агьмат аль-Жабер эсгерген кюйде, Да­гъыстан – юрт хозяйство ва туризм тармакъларда инвестицияланы къолламагъа бек онгайлы ер. Тек Эмиратларда Дагъыстанны яхшы танымай. Бу сапардан сонг таныма имканлы.

Ёлугъувну вакътисинде Дагъыстан Республиканы Гьукуматыны Председатели Абдулмуслим Абдулмуслимовгъа да сёз берилген. Ол анг­латгъан кюйде, Дагъыстанда гьар йыл 35 минг тон къой эт болдурула. Шону 5-6 минг тонун тыш уьлкелеге йиберме де имканлыкъ бар. Дюгюден этилген, крупадан да Дагъыс­тан гьар йыл 10 минг тон берме бола. Ондан къайры да, Дагъыстанда кюреге ва шаптал оьсе. Рази болса, Эмиратлагъа республика кюрегеден 20 минг тон, шапталдан да 25 минг тон йибережек.

Ёлугъувда оьзге тармакълардагъы масъалалагъа да къаралгъан.

Бизин мухбирибиз.