Гетген арбагюн, май айны 24-нде Дагъыстан Республиканы Халкъ Жыйыныны гезикли сессиясы оьтгерилген. Ону барышында 23 масъалагъа къаралгъан. Сессияны ачгъан ва юрютген Дагъыстан парламентни спикери Завур Аскендеров.

Депутатлагъа тавуш берив булан къабул этилме герекли законопроектлени арасында: «Дагъыстан Республиканы Конституциясына алмашынывлар этиливню гьакъында», «Дагъыстан Рес­публикада топуракъ масъалаланы ёрукълашдырывну гьакъында», «Ветеринарияны гьакъында», «Дагъыстан Республикада физкультура ва спортну гьакъында», «Дагъыстан Республикада увакъ ва орта далапчылыкъны оьсювюню гьакъында» ва оьзгелери де болгъан.

Экинчи охувдан сонг асгерге оьзлер сююп ча­къырылгъанланы агьлюлерине болдурулагъан яшавлукъ якълавну тасдыкъ этеген проект де къабул этилген. Завур Аскендеров билдирген кюйде, шолай кёмек этив юрюлюп турагъан асгер операцияны ортакъчыларын янгы уьстюнлюк­леге ругьландырыв булан байлавлу.
Халкъ Жыйыныны гезикли сессиясында Дагъыстан Республиканы Жамият палатасыны членлерин токъташдырывгъа байлавлу масъалагъа да къаралгъан.

Сессияда Юсуп Умавов депутатлыкъ ишинден ва комитетни председателини къуллугъундан азат этилген. Шо къуллукъгъа Алавутдин Мирзабалаев сайлангъан. Дагъыстан Республиканы Халкъ Жы­йыныны бюджет, финанс ва налог комитетини председателини заместители этилип депутат Магьаммат Алиханов белгиленген.
Республикадагъы дыгъар къайдада асгерге чакъырыв пунктуну ёлбашчысы этилип капитан Алексей Иванов токъташдырылгъан. Ол сессияда чыгъып сёйлевю булан янгы ачылгъан идараны алдында токътагъан масъалаланы эсгерген, олай да шо ёрукъда пачалыкъ ва ерли гьакимликлени къуллукъчулары булан да бирче иш гёрювню агьамиятлы­гъыны гьакъында айтгъан, соравлагъа жаваплар къайтаргъан.