Май айны 26-сында Дагъыстан Республиканы Халкъ Жыйыныны он биринчи сессиясы оьтгерилген. Сессияны республика парламентни спикери Завур Аскендеров ачгъан ва юрютген.
Бир башлап депутатлар Дагъыстан Республиканы Халкъ Жыйынындагъы фракцияларыны вакиллерини сёйлевлерине тынглагъан. Олар оьзлени пикруларына гёре гьалиги заманда инг агьамиятлы ва яшавгъа чыгъарылма герекли масъалаланы гьакъында айтгъан. Сонг депутатлар сайланма герекли ярашывлукъ судьяланы кандидатураларына гёре тавушлар берген.
Сессияны ерли гьакимликге багъышлангъан бёлюгюнде Магьачкъала шагьар округну ватандашларыны яшавлукъ масъалаларына, къурулуш- коммунал хозяйство, муниципал мюлк тармакъларда юрюлеген ишлеге байлавлу масъалалагъа къаралгъан. О ёрукъда шагьарны башчысы Салман Дадаев, Дагъыстан Республиканы биринчи вице-премьери Руслан Алиев, Дагъыстан парламентни комитетини председатели Артур Исрапилов ва Гьисап палатаны председатели Билал Жагьбаров чыгъып сёйлегенлер.
Депутатланы тавуш беривю булан бир-бир законопроектлер экинчи охувдан сонг къабул этилген. Бир нечеси биринчи охувдан сонг арагъа салынгъан.
Федерал законлардагъы алышынывлагъа гёре республика законлагъа да тюзлевлер къошма тюше. Энниден сонг Дагъыстан Республиканы иш юрютюв гьакимиятына гиреген жамият советлени вакиллери конкурс къайдада сайланажакъ. Конкурсну оьтгереген Дагъыстан Республиканы Жамият палатасы болажакъ. Автомобиль ва электрик гюч булан ишлейген жамият транспортгъа ва ёл хозяйствогъа пачалыкъ тергев этежек.
Тийишли болуп къабул этилеген законлар юрт хозяйство топуракълагъа пачалыкъ мониторингни ва пачалыкъ реестрни гючюн, имканлыкъларын артдырывгъа, олай да мекенли къайдада юрт хозяйство маллар болдурагъан, чыгъарагъан, ишлетеген производстволаны яхшылашдырма да кёмек этежек.
Н. МАГЬАММАТОВ.
