Дос-къардашына къайтды

26 ноября 2022 в 13:48 104
Оьтген гюнлерде Бабаюрт районну Мужу­къай юртуну жамааты сентябр айны ахырында гёнгюллю кюйде Ватанын украинли миллетчилерден якъламакъ муратда хас дав чаралар оьтгерилеген ерге гетген Салим Курахмаевни сююнч гёзьяшлар булан къаршыладылар.

Ол къуллукъ этеген асгер бёлюк ёлда украинли миллетчилени янындан болгъан атышывну натижасында Салимни аягъына авур яра тие. Госпитальгъа тюшген сонг онда огъар бир-нече керен операциялар да этиле ва ол юртгъа къайтма борчлу бола.

Юртну ягъасында ону къаршылай туруп, халкъ онгаргъан ёлугъувдан Салим халкъы, району ва юрту учун оьктем кюйде оьтдю. Шо гюн гюл байламлар, йырлар, бийивлер, ювукъ адамларыны, къурдашларыны ва халкъны сюювю, сююнчю, гьай этивю бары да Салимге савгъат этилди деме ярай. Къысматгъа къаршы туруп сав къалгъан дегенлей, огъар шолай гьюрмет тийишли де дюр эди.

Оьз гезигинде Салим Къурахмаев юртну жамаатына, ювукъ адамларына, къурдашларына ­оьзюне этилген таъсирли абур-сый учун баракалла билдирди. Сонг да, савлугъун яхшылашдыргъан сонг, тарыкъ болса, Ватаны, халкъы учун дагъы да хас дав чараларда ортакъчылыкъ этмеге гьазир экенин билдирди.

Герейхан ГЬАЖИЕВ.
СУРАТДА: Къурахмаевни дос-къардашы къаршылай.