Дагъыстанда аста-аста булан вакцина этдиргенлени сыдыралары толумлаша барагъанны гьарибиз гьис этебиз. Ондан къайры да, бизге заманында вакцина этдирмеге дарманны етишдирегенни де эслейбиз.
Айтагъаным, алдагъы гюнлерде де «Спутник V» ва «Гам-Ковид-Вак» вакцина 51 минг 200, «Спутник Лайт» буса 40 минг 808 оьлчевде гелген. «Спутник Лайтны» 60 чагъындан оьрдегилеге этмеге ихтияр берилген.
Бирлешген федерал гьисап беривню маълуматларына гёре, Дагъыстанда «COVID-19» инфекциягъа къаршы 363 минг 253 адам вакцина этдирген. 260 минг 826 адам буса толу кюйде 2 тирет вакцина этдирип къутулгъан. Шо буса 27 процент бола.
Россияны савлукъ сакълав министерлиги Дагъыстанда яшайгъанланы 60 проценти вакцина этмеге герек деп норма салгъан. Санавлар булан айтгъанда, 1 миллион 350 минг 407 адам бола. Шолардан да 394 минг 480 адам 60 йыллыкълар ва оьрдеги чагъындагъылар болмагъа тарыкъ. Пандемия башлангъандан тутуп республикабызгъа коронавирусгъа къаршы 504 минг 206 оьлчевде вакцина гелтирилген. Шогъар иммунитетин гётереген дёрт тюрлю вакцина гире: «Спутник V», «Спутник Лайт», «ЭпиВакКорона» ва «КовиВак».
Дагъыстанда бугюнлеге ерли гьар гюн эртен сагьат 10-дан ахшам 19 сагьат болгъанча 86 стационарда ва 58 транспорт пунктларда вакцина этдирмеге боласыз. Эсигизге салабыз, вакцина этдирмек учун паспорт, полис, СНИЛС тарыкъ.
