Дагъыстанда биринчи болуп чалтик чалывну «Кизлярагрокомплекс» жамият къурум башлагъан. Хозяйство бу йыл акъ бюртюклю тирини 2350 гектаргъа чачгъан. Шо буса алдагъы йылдан 750 гектаргъа артыкъ бола. О да негьакъ тюгюл, хозяйствону башчысы шо ашлыкъны оьсдюрмекни пайдасын оьтген йылда билген ва чачыв авлакъларын артдыргъан. Хозяйство бугюнлеге 50 гектар ердеги чалтикни чалып битген ва гьар гектардан аслам тюшюм алып туралар. Шо да яман тюгюл.

Хозяйствону баш агроному Мавлет Хизриев хозяйствода янгы чеклер этме башлагъанны да уллу оьктемлик булан айта, демек, хозяйство чачыв авлакъларын дагъы да артдыражакъ.

Шо районну «Арешевка» деген хозяйствосуну агроному Гьайбулла Гьайбуллаев айтагъан кюйде, бу йыл чалтикни 700 гектаргъа чачгъан ва къайтармакъ учун онгайлы шартланы болдургъан.

Юрт хозяйство управлениени ёлбашчысы Райисат Алилова айтагъан кюйде, бу йыл Къызлар районда чалтик 17,5 минг гектаргъа чачылгъан ва шону къайтармакъ учун 76 комбайн да къолланажакъ. Шолар да етишмесе, хоншу районланы кёмекге чакъыражакъ.

Сёз ёругъуна гёре айтсакъ, Дагъыс­танда чалтик 30 минг гектардан да артыкъ ерге чачылгъан. Шо буса Краснодардан сонг экинчи ерде бола. Республиканы айтса, чалтик 18 районда чачыла ва оьтген йылдан эсе чачыв майданлар 60 процентге артгъан. Шолардан 55 проценти Къызлар районгъа тие, Тарумов районда 4789 гектарда ва Бабаюрт районда буса 2360 гектарда чачыла.

–Россияны юрт хозяйство министерлигинден Дагъыстанны Гьукуматыны янындан сугъарывгъа байлавлу этилеген ишлери зая болмагъанын айрыча айтмагъа сюемен, – дей оьзюню баянлыгъында Дагъыс­танны юрт хозяйство ва сурсат минист­рини 1-нчи орунбасары Шарип Шарипов. – Дагъы затны айтмагъанда,­ бизде мердешленген чалтик чачывну майданларын артдагъы 5 йылны ичинде 10 минг гектаргъа артдырдыкъ. Шолай да, 20 минг гектар ердеги чеклени янгыртдыкъ, бир сменде 250 тон чалтикни ишлетеген заводлар къурдукъ.

Чалтикни болдурмакъ – бир, ону сакълама ерлер де герек чи. Жыйып, учуз багьасына бергенче, 65 минг тон сыягъан дюгю сакълайгъан гьамарлар этилинген. Этилеген гьаракат йылда 150 минг тон дюгю болдурмакъ учун дагъы да къурумлу юрюлежек.

Бу, озокъда, сююндюреген хабар, иш шулай гетсе, дагъы да янгы чеклер къурулар ва адамлагъа иш ерлер ачылар. Шо буса – Дагъыстанны юрт хозяйство ва сурсат министерлигини аслу борчларындан бириси.
.