Дагъыстан туристлени къаршылама гьазирлик гёре

Бизин республикагъа артдагъы бир нече йылны узагъында сапаргъа, геземеге, Дагъыстанны гёзел ерлерин гёрмеге, Хазар денгизде киринмеге кёп санавдагъы туристлер гелмеге башлагъан. Маълумат къураллар язагъан кюйде, 2022-нчи йылда Дагъыстангъа 1,5 миллион турист гелген.

Муна бу йыл да язбаш оьзюню ихтиярларына эрте гирди ва республикабызгъа туристлер гелмеге башлады. Дагъыстан Республикада туризмны оьсювюню ва шону айланасында гёрюлеген чараланы гьакъында ДР-ни туризм ва халкъ саниятланы министри Эмин Мерданов алдагъы гюнлерде «Дагъыстан» деген маълумат агенлигинде журналистлер булан оьтгерген пресс конференцияда хабарлады.

Министрни айтывуна гёре, Дагъыстан Республиканы делегациясы март айны 16 ндан башлап MITT деген Москвада юрюлген халкъара туризм тармакъны выставкасында партнёр гьисапда отакъчылыкъ этген. Юрт уьйню къалибинде этилген Дагъыстанны стендине 3 гюнню ичинде 9 минг адам гелген. Бизин республикадан буса эсгерилген выставкада 27 туроператор оьзлени ишин малим этген. Олар булан Россияны 6 тюрлю регионундан бирлешип чалышмакъ учун кёп санавда дыгъарлар байлангъан. Шоланы арасында Запорожск, Курск, Тюмен, Ульяновский областлар, Татарстан Республика ва Камчатка да бар.

Шолай да, министр эсгерген кюйде, выставкада Тюркияны, Узбекистанны, Азербайжанны ва башгъа тыш пачалыкъланы вакиллери де ортакъчылыкъ этген ва Дагъыстан булан туризм тармакъда аралыкълар болдурма гьазир экенни билдирген.

Выставкада ортакъчылыкъ этген гюнлени натижасында турбизнесни вакиллеринден Дагъыстан Республика булан чалышмагъа гьазир экенин 280 компания билдирген, 80 компания булан дыгъар этилген.
Дагъыстанда туристлик сезонгъа гьазир болувну гьакъында айта туруп Эмин Мерданов гьар йыл артагъагъан туристлени агъымы республикабызны районларында, шагьарларында туристлик ва транспорт онгайлыкъланы яхшылашдырмакъны талап этегенни де эсгерди. Шолай да, «ерли сиптелер» деген проектге гёре гетген йыл туристлик ерлер бар юртларда онгайлыкълар яратылгъанны ва бу йылны баашындан башлап шо иш узатылагъанны айтды.

Бу йыдан башлап Дагъыстанда экскурсиялар оьтгереген адамлар аттестациядан оьтегенлигин ва 2024-нчю йылдан башлап аттестациядан оьтмеген касбучулагъа шо ишни юрютмеге ихтияр берилмегенлигин де эсгерди. Министрны сёзлерине гёре Дагъыстан Республикада экскурсиялар оьтгереген касбучуланы 92-си бу йыл аттестациядан оьтмеге бажаргъан.

Авторизация
*
*
Регистрация
*
*
*
Согласны с условиями сайта?
Генерация пароля