Россияны Президенти Владимир Путинни асгер къуллукъгъа чакъырывну гьакъында билдиривюн яшавгъа чыгъара туруп, Къызылюрт шагьарда да асгерге иш ёрукълу юрюле демеге ярай. Шогъар байлавлу ДР-ни Къызылюрт шагьаргъа, Къызылюрт ва Хумторкъали муниципал районлагъа къарайгъан военный комисса-риатында хас чакъырыв комиссия къурулгъан.
Ери гелгенде айтып къояйым, мунда да мобилизацияны биринчи гюнден тутуп, оьзлер военкоматгъа да гелип, гёнгюллю кюйде асгерге гетегенлер де бар. Оланы ёлгъа салмакъ учун юрюлген чарада военный комиссар Шейхсайит Магьамматов, Къызылюрт район администрациясыны башчысы Рустам Татарханов ва Къызылюрт районара прокуроруну заместители Магьамматшарип Эмеев де ортакъчылыкъ этди.
ДР-ни Къызылюрт шагьаргъа, Къызылюрт ва Хумторкъали муниципал районлагъа къарайгъан военный комиссары Шейхсайит Магьамматов да эсгергени йимик, шолай гетегенлени гёнгю бар ва оланы къасты – Ватаныбызгъа бугюн къоркъунч тувгъанда ону аманлыгъын болдурмакъ.
Бираз алда Къызылюрт шагьарны башчысыны тилевюне гёре, ону заместителлери Шамил Дадаев и Шамил Хачаев дагъыстанлылар дав этивню сырларын уьйренеген Мычыгъыш Республиканы Шали деген шагьарында болдулар. Олар мобилизациягъа гёре чакъырылгъан асгерчилени турагъан гьалын тергеп, сонг ашханасына барып, олар ашамлыкъ булан таъмин этилгени булан ювукъдан таныш болдулар. Дагъыстанлылар Интернетни торунда яйылагъан къайдагъы тюбю ёкъ хабарлар ерсиз экенин ата-анасына, дос-къардашына етишдирмекни тилеген.
