Гьар тюрлю четимликлер себеп болуп, артдагъы 30 йылны ичинде юзюмчюлюк тармакъны оьсдюрювде савлай республикагъа белгили Къаягент районда къурулгъан 5 чагъыр заводланы бугюн янгыз бириси ишлей. Мугькамлардан саналагъан юзюмчюлюк хозяйстволаны да кёплери тозулгъан. Совхозланы кюрчюсюнде къурулгъан ГУП-ланы да хозяйство ишлери, экономика гьалы макътардай тюгюл. Шону учун оланы республиканы гьакимияты акционер жамиятларына айландырма токъташды.

Совет гьукуматыны йылларында Къаягент райондагъы «Къаягент» ­совхозну чагъыр заводу гьар йыл 20-22 минг тон татли емишни къабул эте эди. Оьзге заводлар йимик, бу завод да гьали толу ишлемеге бажармай. Шогъар гёре ГУП-ну ёлбашчылары Къызлардагъы коньяклар чыгъарагъан завод булангъы дыгъаргъа асасланып, гьар йыл 1 мингден 10-15 мингге ювукъ тон татли емишни къабул эте.

– Юзюм аслу гьалда бизин хозяйствону авлакъларында жыйыла, – дей ГУП-ну директору Магьамматшакир Алибеков. – Сонг да, гьалгъа къарап, оьзге хозяйстволар, далапчылар, ижарачылар оьсдюрген юзюмлени де къабул этебиз. Ишлерибиз яман тюгюл, плангъа гёре юрюле. Янгурлар четим этмесе, ­гелеген айны башларына юзюм къайтарыв кампанияны тамамламагъа къаст бар.

Алдагъы йылларда йимик бу йыл да юзюм къабул этив ва ишлетив иш къурумлу салынгъан. Татли емишни къабул этеген къуллукъланы, цехни ичинде чалышагъан касбучуланы гьаракатына разибиз, – дей цехни ишлетеген инженер-технолог Загьра Ибрагьимова. – Яхшы тюшюм оьсдюрюлген. Заводгъа гелеген юзюмлер таза, татлиси талаплагъа жавап бере.

Гертиден де, юзюмчюлер бу йыл бавларда таза ва мол тюшюм оьсдюрмеге бажаргъанлар. Бугюнгю аслу масъала – тюшюмню тас этивсюз белгиленген болжалда къайтармагъа тарыкъ. Шо масъаланы чечмек учун бугюн хозяйствону касбучулары, ишчилер, механизаторлар борчларына бажарывлу янаша. Оланы ишине сёз тапма къыйын.