9 Майда Буглен школаны абзарында ясалгъан эсделикни алдында оьтгерилген уллу жыйында къыргъын давну акъубаларын ва къоччакъларын сёйлегенлер биринден-бири алып макътав сёзлер айтдылар.
– Ёлдашлар! 9 Май гёзьяш къатыш – лап уллу байрам. Ватанны талайлы гележеги учун жанларын къурбан этгенлени биз, олардан къалгъанланы наслулары, бир заманда да унутма тюшмейбиз. Яш наслуну бизин ата-бабаларыбызны къоччакъ уьлгюлерине уьйретип тарбиялавгъа, бугюнгю байрам чараны таъсирли ва арив этип оьтгеривге гёре къасткъылагъаны саялы, Буглен школаны савлай коллективине уллу разилик билдирме сюемен.., – деди оьзюню сёйлевюнде юртну баш гьакими Абукерим Жанболатов.
Давгъа, Уьстюнлюкге багъышлап яшлар шиърулар булан аралашып, йырлар да айтдылар, оьзлер сагьналашдыргъан маъналы оюнланы гёрсетди. Ахырда эсделикни аякълыгъы булан тахчаларын гюл байламлагъа толтуруп къойдулар.
