Бабаюрт районну полиция къуллукъчуларына вакцина этилген

5 февраля 2021 в 21:40 87
Россияны МВД-сини Бабаюрт райондагъы бёлюгюню къуллукъчуларына коронавирус аврувгъа къаршы вакцина этип башлагъан.

Вакцинаны этдиргенлени сёзлерине гёре, укол авуртмай, мердешленген тумав аврувгъа этеген вакцинадан къалышмай ва оланы вакцина этдирген сонг къаркъарасында бир тюрлю алмашынывлар да болмагъан.

Бабаюрт район больницаны баш врачы Шигьмагьаммат Дугьужев билдирген кюйде, вакцинаны таъсирлиги 95 процентге етише.

«Вакцина адамны коронавирусдан толу кюйде, яда буса ону авур агъымындан сакъламагъа кёмек эте. Сонг да, вакцина адамны коронавирусгъа къаршы иммунитетин гётере. Демек, вакцина бизин шо авур аврувдан къоружакъ», -- дей Дугьужев.

Вакцина эки тиретде этилегенни эсгермеге сюебиз. Вакцинаны биринчи дозасы этилип, арадан 21 гюн гетген сонг, экинчи доза да этиле ва шону булан адамны къаркъарасы коронавирусгъа къаршы толу гюч ала.