Абдурахман Махмудов: «Халкъны яшавлукъ гьалларын яхшылашдырывгъа тергев арта»

Оьтген жуманы ахырында «Дагъыстан» деген маълумат агентлигинде Дагъыстанны загьматны ва яшавлукъ оьсювню министри Абдурагьманом Магьмутовну пресс-конференциясы оьтгерилди. Шо аслу гьалда яшавлукъ масъалаланы айланасында юрюрлдю: кёп яшлы агьлюлеген этилеген кёмеклер, яшавлукъ контрактлар, адамланы иш булан тахмин этив ва башгъалары.

Абдурагьман Магьамматович кёп яшлы ва яшаву осал агьлюлер гьар даитм де тергевню тюбюнде дюр ва болажакъ экенни эсгере туруп, министерликден шолайлагъа 30 тюрлю  акъча кёмеклер этилгенни айтды.  Шолай да аслу тергевню тюбюнде 3-7 йыллыкъ яшлагъа берилеген акъчалар ва яшавлукъ контрактлар.

-Янгыз бу йыл адамлар булан 6900 яшавлукъ дыгъар этилинген, - дей ол. – Аслу гьалда шо акъчалар оьзбашына ишлейгенлеге, абзаръягъа хозяйстволар къурагъангъа, яшаву къыйынлы ва осал адамлагъа бериле. Шолар юртлардагъы адамлагъа йибериле, шоланы къоллайгъан кюй буса районлардагъы халкъны яшавлукъ яндан якълайгъан управлениелеге тапшурулгъан.

Газетлени мухбирлерини соравларына жаваплар бере туруп, кёп яшлы агьлюлеге автомашинлер берилегенни гьакъында да айтды. Бу йыл шолай автомашинлер он ва шондан кёп яшы булангъы 5 агьлюге берилгенни де билдирди.

Нечик чаралар гёрюлсе де, адамланы иш булан таъмин этив толу кюйде чечилип битмеген. Абдурагьман Магьамматович шону гьакъында да айтды. Бу йыл гьисапгъа тюшме гереклер аз болгъан, шолар буса гьукуматны янындан агьлюлеге этилеген кёмекни натижасы болма ярай.

Булайына, ишлемейген адам ёкъ деп айтма ярай, адамланы бирлери, «гёнелткиде» къалып ишлейлер, демек, ол ишге алынмай ишлейлер, огъар акъчаны тюпден таба бере. Шолай этсе ишлейген адамгъа пенсия фондгъа йиберилеген акъчасы далапчыны янында къала, натижада буса ишчиге шондан бирдокъ да. Шону учун да гьар адамгъа адатлангъан закон ёл булан ишлеме герек.

-Буссагьатгъы заманда «гёнелткидеги» ишчилени аян этмек учун ерлердеги муниципалитетлер ва  ва адамланы ихтиярларын якълайгъан къурумлар къаныгъывлу ишлейлер, - деп давам эте сёзюн А.Магьмутов. – Эгер де олар уьйлеринде яшыртгъын ишлей буса да, ишин аян этме, гьисапгъа алынма гереклер. Ишсизлени иш булан таъмин этивюбюз, тюрлю касбулагъа уьйретив бугюнлерде юрюле. Сёз ёругъуна гёре айтсам, янгыз бу йыл 36 минг адамгъа иш тапгъанбыз. Янгыз олагъа тюгюл, сакъатлыгъы барлагъа да.  

«Ёлдаш» газетни вакили де министргъа сорав берди: «Министргъа арзгъа булан гелип боламы, не гюнлер къабул эте? Сиз артдагъы айларда районлагъа барып, ерлерде иш салынгъан кюйню тергейсиз, не кемчиликлер булан ёлугъасыз?

-Мен итнигюн ва хамисгюн къабул этемен, тек арекден гелген буса, шогъар къарамай шо адам булан ёлукъма чола табаман. Магъа ишден тайдыргъан деген масаъалалар булан кёп геле, шоланы да закон ёлда чечебиз. Ерлерде де кёп боламан. Шонда коллективлер, адамлар булан ёлугъаман. Масъалаланы да шо ерде чечебиз. Бизин министрлик бугюнлерде инг де тарыкълы деп санала, яшлагъа акъчалар берив, иш булан таъмин этип, яшавлукъ контрактланы пайлав, хас операцияда ортакъчыланы этегенлени агьлюлерине кёмек болдурув ва башгъалары. Шолар бары да кютюле…