Абдулзагьир Мусаев ва яш суратчылар…

Россияны чебер (художество) академиясыны член-корреспонденти, профессор Абдулзагьир Мусаев, Магьачкъаладагъы педагогика университетни чебер-графика факультетини оьзю дарс береген тогъуз студенти этген чебер-графика ишлерин де къуршап, суратлав инчесаниятны музейинде «Мифология графики» деген выставканы ачгъан.

Шо выставкада ДР-ни маданият министри Зарема Бутаева да болгъан. Ол оьзюню сёйлевюнде: «Абдулзагьир Бозигитович, Сиз, оьзюгюзню студентлеригизни юреклеринде инче гьислер тувдурма, оланы пагьмуларын ачма бажаргъансыз, ата-бабаларыбыздан къалгъан эдеп, къылыкъ къайдалагъа уьйретме болгъансыз. Сизге ва студентлеригизге сурат инчесаниятны сюегенлеге этген савгъаты­гъыз учун баракалла. Выставканы къургъанлагъа да разилигимни билдиремен»,– деген министр.

Музейни директору Салигьат Гьамзатова айтгъан кюйде, Абдулзагьир Мусаевни «устаханасында» рес­публикагъа аты айтылгъан пагьмулу художниклер билим ала ва тарбиялана.

Выставкагъа гелгенлерден Россияны ва Дагъыс­танны халкъ художниги Гьейбат Гьейбатов, ДР-ни Башчысыны кёмекчиси Людмила Авшалумова, ДГПУ-ну ректору Нариман Асваров, «Дагестан» деген пачалыкъ-телерадио каналны директоруну заместители Салам Хавчаев, РФ-ни ат къазангъан художниги Хайруллагь Къурбанов да яш художниклер этген суратлагъа къарагъан сонг, оьзлени ойларын айтгъан. Оьз гезигинде Абдулзагьир Мусаев выставкагъа гелгенлеге ва яш художниклени ишлерине багьа бергенлеге гьакъ юрекден баракалла билдирген.
Выставка 12-нчи май болгъанча ишлежек.

Авторизация
*
*
Регистрация
*
*
*
Согласны с условиями сайта?
Генерация пароля