Россияны Президенти Владимир Путинни гьар йыл Федерал Жыйынгъа этеген Чакъырыв кагъызы адатлы гьалда 15-нчи январда оьтгерилди.
Яшавгъа чыгъармакъ учун алгъа салынагъан масалалар бу йыл айрокъда кёп ва мекенли деп айтма ярай. Биз де бу йылгъы Чакъырывгъа тергевлю кюйде тынгладыкъ ва маданият тармакъгъа байлавлу айтгъан сёзлерине бек рази къалдыкъ.
Ол 2023-нчю йылгъа ерли Россияны кёп-кёп шагьарларында маданият-илму центрлар ишлеме башлажакъны эсгерди. Шо центрларда уьлкебизни уллу музейлери, театрлары, яратывчулукъ оьр охув ожакълары оьзлени яратывчулукъ ишин, касбу пагьмусун, сынавун гёрсетме башлажакъ.
Маданият яшавун сюегенлер, пагьмулу адамлар, оьзлени ишине берилген адамлар айрокъда регионларда, ерлдерде кёп. Оланы крайны уьйренивге байлавлу, халкъ яратывчулугъуна байлавлу, тарих варислигибизни къоруп сакълавгъа байлавлу проектлерин якълама ва президент грантланы Фондундан харж булан кёмек этме герек. «Культура» деген милли проектге 17 миллиард манат акъча берилежек. Дагъы да маданият центрланы, юрт клубланы якъламакъ ва оьсдюрмек учун 6 миллиардддан къолай акъча гёрсетиле.
Къазангъан акъчагъа налог тёлемейгенни болжалы бу йылны январ айыны биринде бите. Шону болжалын тайдырып, даимге шу гьалда, налог тёлемейген кюйде къойма герек. Шолай этсек, регионлардагъы музейлер, театрлар, китапханалар йылда 4 миллиад манат экономия этме бола ва оьзлени къуллукъларына, оьсювюне, алапасын артдырывгъа харжлап бола», деди Президент. Театр ва инчесаният тармакъгъа шо кёп уллу пайда гелтирежек ва бизин коллектив шону уллу разилик булан къабул этди.
Скандарбек Тулпаров,
режиссёр, Къумукъ музыкалы-драма театрны директору.
