Ноябр айны 4-нде Россияда «Халкъны бирлигини гюню» деген пачалыкъ байрам оьтгериле. Бизин уьлкеде бу байрамны белгиленивю йыракъ 1612-нчи йыл булан байлавлу геле ва Россия учун бек агьамияты булангъы агьвалатлардан алына. О йыл гюзде халкъ жыйылып, Кузьма Мининни ва Дмитрий Пожарскийни ёлбашчылыгъы булан Москвадагъы Кремлден поляк-литва елевчюлени къуваламагъа бажарылгъан.
Мининге ва Пожарскийге Москвадагъы Къызыл майданда эсделик салынгъанлы да кёп бола. Шолай эсделик 2005-нчи йылда, ноябр айны 4-нде Новгород шагьарда да ачылгъан.
Бирликни гюню Россияда пачалыкъ оьлчевде булай хас къайдада белгиленегени кёп болмай. Байрам 2004-нчю йылны декабр айыны 29-нда чыкъгъан федерал законгъа гёре, артындагъы 2005-нчи йылны ноябр айыны 4-нден башланып оьтгериле. Халкъ ишлемей ял алагъан гюн.
Болса да, шо гюн адамлар байрамны белгилемек учун орамлагъа, шагьар майданлагъа чыгъып, онда оьтгерилеген шатлы чараларда ортакъчылыкъ эте. Бизде, Магьачкъалада, Ленинни атындагъы майданда, Р.Гьамзатовну проспектинде, «Родоп» бульварда, башгъа ерлерде де шагьарлылар ва гелген къонакълар гьар тюрлю милли бийивлеге, йырлавлагъа, концерт программалагъа къарама бола.
Халкъланы бирлиги, татывлугъу ва дослугъу уьлкени бугюнгю яшаву ва гележеги учун да бек агьамиятлы ва тарыкълы ругь даража деп айтма ярай. Шону болдурмакъ учун, пачалыкъ политика береген дагьни булан тамамланып къалмайлы, оьзю гьар ким де болагъан гьаракатын юрютме тарыкъ бола. Ватан къайсы да адам учун ата-анадай сыйлы. Гьар-бир ватандаш атагъа да, анагъа да этилеген гьюрметни эли учун да этме борчлу.
Патриот ругьну кюрчюсюн салагъан шо ватандаш къуллукъ, гьалиги вакъти Донбасда юрюлюп турагъан хас асгер чараланы вакътисинде айрокъда бек тарыкълы.
