Максим Решетников: « Оьсювню болжалы 2030-нчу йылгъа ерли узатыла»

Россия Федерацияда экономика оьсювню министерлигини сиптечилиги булан къурулгъан «Темиркъазыкъ-Кавказ федерал округуну оьсювю гьакъында» деген пачалыкъ программа 2030-нчу йылгъа ерли узатыла. Шо гьакъда экономика оьсювюню министри Максим Решетников Дагъыстанда болувунда оьз пикруларын малим этген.

Москвадан Дагъыстангъа ишчи сапары булан гелген федерал оьлчевдеги гьаким яшавлукъ-экономика масъалаланы ахтара туруп, тахшагьардан Хумторкъали райондагъы Тёбе посёлокну ювугъунда къурулгъан индустрия паркда ва шолай да орамлагъа тутагъан плитка, шиша чыгъарагъан Каспийск заводларда болгъан.

 

Шондан сонг ол оьзюню ишчи сапарын Къыбла Дагъыстангъа – Дербент бойгъа багъып узатгъан. Республикабызны промышленностуну ва шолай да промышленный маллар чыгъарагъан заводларында ол айлана якъда ва иш ерлерде болдурулгъан онгайлыкълар –яшавлукъ объектлени гьалы булан ювукъдан таныш болгъан.

 

Уьстде де эсгерилген кююнде, Максим Решетников регионда яшавлукъ-экономика предприятиелени, школаланы, ясли бавланы, спорт имаратланы къурув ва пайдаландырывгъа берив гележекде ишчи ерлени артдырмагъа ва шону натижасында ишсизликни ёрукълашдырмагъа кёмек этежеги гьакъда айтгъан.

 

Озокъда, шону учун эсгерилген программада белгиленген жаваплы борчланы толу кюйде яшавгъа чыгъармакъ учун пачалыкъны ва шолай да далапчы тайпаланы-маячыланы харжларын талам-такъыш болмагъа къоймайлы, асувлу кюйде пайдаландырыв агьамиятлы масъала санала.

 

Шону гьисапгъа алып, пачалыкъны янындан эсгерилген программада гёрсетилинген борчланы уьстюнлю кюйде яшавгъа чыгъармакъ учун СКФО-гъа 14 миллиард манатны къадарындагъы акъча маяланы пайдаландырмагъа умут этиле. Шолайлыкъда, СКФО-ну республикаларында дагъы да 2,4 миллион адамгъа иш ерлер болдурулажагъы гьакъда да айрыча эсгерилген.

 

Оьзюню ишчи ёлугъувунда РФ-ни экономика министри аянлашдыргъан кююнде, 2020-нчы йылда аслу харжлагъа маячыланы инвестиция маяларыны къошулуву да Дагъыстанда 14 процентге ювукъ къолайлашгъан. Шо да – Темиркъазыкъ-Кавказ федерал округундагъы регионланы арасында лап гёрмекли натижа.

 

Россияда Дагъыстангъа яшавлукъ-экономика масалаланы ёрукълашдырмакъ муратда 2021-2024-нчю йыллагъа гьар йылгъа гьисап этгенде 1,4 миллиард манат харж айырылгъан. Бизин республикабыз Россияда оьсювню чалтлашдырыв региону гьисапда токъташдырылгъаны гьакъда да айрыча эсгерсек дурус болур.

 

Белгили болгъан кююнде, харжланы ломай пайы да Дербентдеги «Южный» деген микрорайонну оьсдюрювге бакъдырылажакъ.

 

Авторизация
*
*
Регистрация
*
*
*
Согласны с условиями сайта?
Генерация пароля