«Кюлеме кюлкю тюгюл»

А-П. Салаватовну атындагъы Къумукъ музыкалы-драма театрда бугюнлерде яш режиссёр Завур Алиев салгъан «Кюлеме кюлкю тюгюл» деген спектакль гёрсетилип тура. Гетген асруну 60-нчы йылларында язылгъан ва сагьналарда ойналгъан бу спектакль бир актлы, айры-айры эки пьесадан къурулгъан. Белгили драматург Александр Вампилов Совет Союзуну заманында адамланы яшав гьалын, оланы умутларын, хыялларын, яшав даражасын гёрсетме болгъан.


Къумукъчагъа бу пьесаны белгили режиссёр Зубайыл Хиясов таржума этген ва сагьнада ойналгъан, къаравчуланы разилигин алгъан. Завур Алиев театрны жагьил артистлерин де къуршап салгъан бу спектакль гьалиги заманны, гьалиги яшавну агьвалатларын да арагъа чыгъара.



Спектаклде къонакълар кёп гелеген учуз петерде, къонакъюйде болгъан агьвалатлар суратлана. Совет Союзуну гьар тюрлю ерлеринден гелип бу петерге къонакъ тюшген адамлар аз заманны ичинде оьзлерден ихтиярсыз тамаша гьаллагъа тюше.



Алдындагъы гюн яхшы кюйде кеп чегип, экинчи гюн башы авруйгъан, экспедитор Угаров (ДР-ни ат къазангъан артисти Магьаммат Касимов ойнай) ва ону шофёру Анчугин (Элдар Магьамматов) башларын сав этмек учун ички алмагъа уьч манат излей, табып болмай. Сонг петерни терезесин де ачып Анчугин къычыра, кёмек этигиз, юз манат беригиз деп. Масхарагъа къычыра. Акъча береген адам болур деп гьеч умут этмей. Ону къычырыгъына хоншу уьйдеги жыкъы согъувчу, гастроллагъа гелген музыкант Базильский (ДР-ни ат къазангъан артисти Пахрутдин Ихивов) магъа пуршав этесиз деп булар булан уруша.



Кёмек этигиз деген тавушну эшитип инженер, агроном Хомутов буланы уьюне гелип юз манат бере. Неге бере, негьакъ тюгюл деп Потапов ва Анчугин агрономгъа инанмай, тутуп байлай, соравдан сорав чыгъа. Къонакъюйню администратору Калошин де даим гьакимлерден къоркъуп, тергевге геле деп къарап, гьавлия, башдан тайгъан адам болуп гёрюнюп (ДР-ни ат къазангъан артисти Темирлан Умаев) бек къужурлу келпет яратып бажарды. Бу спектакл­де ресторанны официанткасы болуп Жанна Исрапилова, иш излейген къыз болуп Камила Шамилова да оьзлеге тапшурулгъан ролланы пагьмулу кюйде ойнады.



Авторизация
*
*
Регистрация
*
*
*
Согласны с условиями сайта?
Генерация пароля