Ярышлардан къайтгъан сонг, дюньяны эки керен чемпиону, Европаны чемпиону ва Россияны алты керен чемпиону Магьачкъаладагъы Жамал Къасумовну атындагъы клубда тарбиялангъан Зайналабит Магьамматовдан И.Гьажиев баянлыкъ алгъан. Шону сизин тергевюгюзге беребиз.
– Зайналабит, гьали сен Россияны алты керен чемпиону болдунг. Тай бокс булан къайда машгъул болма башладынг, биринчи тренеринг ким эди?
– Мен 1989-нчу йылда Гьюсемегент юртда тувгъанман. Мени биринчи тренерим – Эльберт Къазанатов. Ол мени башындан тутуп спортну сырларына уьйретди. Ата юртумдагъы школаны битдирген сонг, Магьачкъаладагъы политехника университетге охума тюшдюм. Энни онда тай боксгъа тренировкалагъа юрюме башладым.
–Ярышланы финалында сен ерли Кемерово шагьарлы Валентин Семёнов булан . Кемерово шагьардан кёп айтылгъан тайбоксёрлар чыкъгъан. Семёнов булан ябушма ябушдунгъыйын сама болмадымы?
–Тюз айтасыз, Кемерово тай боксну ватаны деп айтма да ярай. О шагьардан дюньяны ва Европаны чемпионлары чыкъгъан.
Финалда мени булан ябушгъан Семёновну яхшы таныйман. Ону булан бирче Россияны жыйым командасыны сборларында кёп болгъанман. Ол нечик ябушагъанны да биле эдим. Шо саялы да оьзюме инана эдим. Эки дюнья ва бир Европа чемпионатларда ортакъчылыкъ этгеним магъа сынав топлама имканлыкъ берди. Тюзю, Йыракъ Кемеровода Россияны алты керен чемпиону болурман деп ойлашмай эдим. Уьч де раундну ичинде къаст къылып, гьужум этип турдум ва судьялар магъа очколар бердилер. Мен ону 5:0 санав булан утма болдум. Россияны чемпионатына баргъанча алда тренерлерим Зайналбек Зайналбеков ва Амирбек Амиржанов (экевю де Россияны ат къазангъан тренерлери, къумукълар) мени тренировкаларда чемпионатгъа яхшы гьазир этдилер. Кемеровода кёстекли Абдулкерим Салаватов да уьст гелип, Россияны уьч керен чемпиону болду.
– Россияны чемпиону болгъанлар къайсы ярышларда ортакъчылыкъ этежеклер?
– Биринчи ерни алгъанлар эки айдан Санкт-Петербургда оьтгерилежек бютюндюнья оюнларда ортакъчылыкъ этежеклер. Шо ярышларда дюньяны бары да пачалыкъларындан 2-3 минг спортсмен гележек. Кикбоксингни, тхэквондону, киокусинкайны, тай боксну, каратэ-до, ушу-саньданы, кунг-фуну уллу байрамы болажакъ. Аллагь буюрса, онда да уьст гелме къаст этежекмен.
Суратда: З. Магьамматов.
