Гьар авурлукъда ябушагъанланы арасында гьар тутушув бек «къайнар» кюйде юрюле эди.

84 кило авурлугъу булангъыланы арасындагъы «уьче­шив» нечик битегенин гёрме сюегенлер айрокъда кёп эди. Неге тюгюл, оьз заманында Хизри Исаевич шо авурлукъда ябушгъан. Эсгерилген авурлукъда 1-нчи ерни алажакъ адамгъа савгъат гьисапда берилежек бек исбайы «Приора» спорт къаланы абзарында есин къаравуллап токътагъан эди.

Халкъара даражадагъы атны къазангъан белгили кочапланы 3-вюнден 1-и сама финалгъа чыгъып болмады. Янгы арагъа чыгъып гелеген бир-бир яш кочаплар буса 20-дан да къолай бал алгъан гезиклер болду.

Узун сёзню къысгъасы, 84 кило авурлукъдагъыланы арасында буйнакскили Гьамзат Османов 1-нчи ерни алып, лап уллу савгъатгъа – «Приора» машинге, 30 минг манатгъа, хас дипломгъа ва медальгъа ес болду. Ол финалда Магьачкъаладан гелген кочап Ражаб Закарияевни утду. Машинни ачгъычларын Гьамзатгъа район администрация башчысыны заместители Набиюлла Гьажибатыров тапшурду.

66 кило авурлукъда ябушгъанланы арасында бирдагъы бир буйнакскили Али Магьамматханов 1-нчи ерге ва тийишли савгъатлагъа лайыкълы болду. 55 кило авурлукъда ябушагъанланы санаву лап кёп эди. Мунда магьачкъалалы Магьамматгьабиб Къазимагьамматовну утгъан гьеч ким болмады. 120 килолуланы арасында Магьаммат Каратов 1-нчи ерге чыкъма бажарды.

Ярышланы 1-нчи гюнюнде Россияны ат къазангъан тренери Иманмурза Алиевге (капиркъумукълу) Дагъыс­тан Республиканы Президенти Р. Абдулатиповну атындан язылгъан сагьат тапшурулду.

2-нчи гюн 3 тюрлю комплект медаллагъа ес болмакъ учун ябушувлар узатылды. Оьзлени авурлугъуна гёре шонда М. Муталимов (66 кг), Тажутдин Мухтаров (96 кг) алдынлыкъ алдылар. Уьст гелгенлени ва оьзге савгъатлы ерге ес болгъанланы барысына да медаллар, кубоклар, акъча савгъатлар, телевизорлар берилди.

Спортну белгили ветеранлары Умар Хаблиевге, Шамил Хуталиевге, Нажмутдин Нажмутдиновгъа, шолай да, Россияны оьзге ерлеринден гелген чакъы командаланы вакиллерине де Буйнакск районну гьакимиятыны атындан хас савгъатлар тапшурулду.

Сонг да, бу турнирни барышында кикбоксдан дюньяны 5-нчи керен чемпиону болуп гелген Шамил Абдулмежитовгъа ва ону тренери Ислам Ибрагьимовгъа район администрацияны башчысыны заместители Н.Гьажибатыров оьз ягъындан акъча савгъатлар тапшурду.



Абдулла ЗАЛИМХАНОВ.

Суратда: Х. Шихсайитовну атындагъы ярышланы барышындан мюгьлет.

М-Гь. ЗАЙДИНОВ чыгъаргъан сурат.