Шо саялы болмагъа ярай, саранскилилер булан оьтгерилген бу оюн къаравчуланы айрыча тергевюн тарта эди. Бизин команданы якълайгъан къаравчулар оюнну эки де таймыны узагъында гётеринки якълап тургъаны да шону герти кюйде исбатлады. Ачыкълашдырып айтсам, бизин къонакълар топгъа ес болгъан мюгьлетлерде стадионда къавгъа гётерилип къала эди. Шолайлыкъда, бизин къаравчулар «Мордовияны» къапучусуна ва якълавчуларына болагъан пуршавлугъун, оьз командасына буса оьзлени къолундан гелеген кёмегин этип турду.
Шо гьакъда айта туруп, шу ерде мен бизин къаравчулардан судьялар да бираз тартындымы экен деп эсиме гелгени гьакъда айрыча эсгермеге сюемен. Эгер тартынмагъан болгъан буса, оюнну 40-нчы минутунда къонакъланы къапусуна уьч метрден де къолай офсайдда да токътап Боли гийирген топну бири тюгюл, эки де судья гьисапгъа алмажакъ эди. Шо офсайдны буса янгыз футболистлер тюгюл, олар булан, озокъда, къаравчулар да эс этгендир. Оюнну шо мюгьлети гьакъда оюн битгенде, къонакъланы баш тренери де журналистлеге къарсалап айтды.
Экинчи таймны барышында къонакълар оюнну санавун тенглешдирмек мурат булан дёрт якълавчуну орнуна, уьч якълавчу булан команданы чапгъынларында ортакъчылыкъ этеген футболистлени бир адамгъа кёп де этип, «Анжини» къапуларын гьужумгъа тутма къарады. «Анжи» буса, оюнну санавун гьисапгъа алып, артгъа тартылып, гери чапгъынлагъа умут этип ойнады. Шо гери чапгъынланы бирисинде, оюнну 57- нчи минутунда, Карлен Мкртчян ургъан топ къонакъланы якълавчусуна тийип, къангып барып, Нукри Ревишвилини къапусуна гирип токътады. Шолайлыкъда, оюнну санаву 2:0 болду.
Командалар ёлугъувну лап ахыры болгъунча дагъы гьюнер гёрсетмеге болмады. Оюнгъа гёрсетилген 90 минут битген сонг, судья дагъы да уьч минут къошду. Къошулгъан заман да бизин команда учун пайдалы чыкъды. Дейгеним, къошулгъан заманны экинчи минутунда Абдуллавов ургъан топну Ревишвили гери ургъан сонг, бизин команданы жагьил футболисти Магьаммат Мусалов топгъа инг алда етишип, ону къонакъланы къапусуна бакъдырды. Шолай, оюн 3: 0 санав булан тамамланды. Алда буса – Самара!
Ш. КИШИЕВ.
