Бизин якълы спортчу Гьажи Гьамзатов 57 кило авурлукъда ябуша. Ол шонда рингге уьч керен ябушма чыкъгъан ва ёлугъувланы оьр даражада, уьстюнлюк алып тамамлагъан. Биринчи ябушувунда ол Къыргъызстандан гелген Р. Маратбековну экинчи раундда эсден тайдырып утгъан.
Ярым финалда Гьажи Сербиядан гелген спортчу Л. Анджиелковичден уьст гелген. Финалда буса Мадагаскардан чыкъгъан бек гючлю спортчу Рандриаманантенни утма бажаргъан.
Бу улан алда да дюнья оьлчевюндеги ярышларда яхшы гьюнер гёрсетген эди. Бу йыл Россияны кикбоксинг ярышларында утуп, Италиягъа дюнья чемпионатгъа барып гелди.
Дюньяны чемпиону деген оьр атгъа ес болгъан бизин якълы яш спортсмен Гьажи Гьамзатов ва ону ябушма уьйретеген тренери, Россияны ат къазангъан тренери Ислам Ибрагьимов Буйнакск районну башчысы Даниял Шихсайитовгъа ва Буйнакск район администрацияны башчысыны заместители Набиюлла Гьажибатыровгъа даимлик гьай этивю ва чемпионатгъа барма къол ялгъагъаны учун гьакъ юрекден баракалла билдирелер.
Оьз мухбирибиз.
СУРАТДА: Гь. Гьамзатов оьзюню тренери И. Ибрагьимов ва район администрацияны башчысыны заместители Н. Гьажибатыров булан.
