Бу айны он уьчюнде бизин Евролиганы ярымфиналында «Анжи» Голландияны «АЗ Алк­мар» командасына 0 – 1 санав булан утдурду. Тек шо оюнда «Анжини» айыплама бир инсанны да тили айланмас деп эсиме геле. Оюнну узагъында «Анжи» гол гийирмек йимик къоркъунч­лу, азында, беш мюгьлетни къолдан чыгъарды. Судьялар «АЗ Алкмарны» къапусуна гирген тап-таза голну да санамады.

Али Гьажибековну гиччирек хатасы саялы, судья оьзге судьялар бир де бермежек пенальтини бизин къапугъа берди. Шо пенальтини де голландиялыланы футболисти Йоханссен Кержаковну къапусуна гийирди. Шондан къайры, оюн юрюлюп тургъан 90 минутну ичинде «Алкмарны» футболистлери «Анжини» къапусуну алдында шу деп айтма бир къоркъунчлу мюгьлет де яратмады. Тек оюнну утду! Утду гьисаплана!

«Анжи» олардан гючлю команда экени гёрюне эди буса да, гьеч зат этип башына чы­гъып болмады. Энни март айны 20-сында «АЗ» бизге геле, Раменское шагьарда экинчи оюн болажакъ. Голландияны командасын утмакъ учун оьзюбюзню къапубузну гол гирме къоймай сакълап, оланы  къапусуна, азында, эки топ гийирме герек. «Анжини» гетген оюнуна къарагъанда, бизинкилеге инанабыз! Судьяланы хаталарын бары журналистлер, тренер — специалистлер ачыкъдан-ачыкъ гючлю танкъыт этди.

 

«Спартакгъа» хасиятыбызны гёрсетдик!

 

Голландиядагъы оюндан сонг уьч гюн гетип, «Анжи» Москвада, Черкизово стадионда Россияны чемпионатында «Спартак» булан ёлукъду. «Анжиге» бу оюнну утдурма ярамайгъанын бизден яхшы «Спартакны» футболистлери биле эди. Оюнну 19-нчу ва 23-нчю минутларында бизин  якълавчуларыбыз Гьажибековну ва Епурянуну эки хатасындан пайдаланып, москвалылар бизге эки топ гийирди. Шо эки мюгьлетден къайры, биринчи таймда «Спартакны» айтардай къоркъунчлу мюгьлетлери де болмады.

«Анжи» буса оьзюню оюнун ойнап болмай, оюнну биринчи 45 минуту гетди. Танапусну вакътисинде баш тренерибиз Гьажиев, раздевалкада бизин футболистлеге бек къарсалап, урушуп, бирлерин чи гьатта уялтып, сонг экинчи таймны тактикасын англатды.

Экинчи тайм башлангъан сонг он минутдан бираз къолай гетип, якълавчубуз Епуряну башы булан уруп, «Спартакгъа» биринчи голну гийирип, биринчи таймда этген оьзюню хатасын тюзледи – 1– 2. Сав экинчи тайм «Анжи» оюнну тизгинлерин оьзюню къолундан чыгъармай турма бажарды. Судья Лапочкин, Бухаров гийирген экинчи голну санамады. Оюнгъа берилген 90 минут гетди. Судья беш минут къошду. Шо къошулгъан беш минут да гетип битди деген заманда бизин Сердер Сердеров, «Спартакны» якълавчусундан топну «урлап», экинчи голну гийирди. Ничья – 2-2.

Энни бу айны 20-сында, негерек этип буса да, «АЗ Алкмарны» енгме тарыкъ!