9 тюрлю авурлукъда оьтгерилген шо ярышларда Дагъыстанны 11 тюрлю районларындан ва шагьарларындан гелген 100-ден де артыкъ кочап ортакъчылыкъ этди.
Къужурлу агьвалатгъа айлангъан шо ярышларда «Къарабудагъгент район» деген муниципал къурулувуну башчысы Къапур Исаев, район администрацияны ёлбашчысы Агьмат Гьажиев ва олай да Дагъыстан Республиканы белгили спортчулары, тутушуп ябушувдан Олимпия оюнларыны 1-нчи чемпиону Загалав Абдуллабеков, Олимпия оюнланы гюмюш медалын къазангъан Магьамматхан Арацилов, спортну ат къазангъан устасы Къазанбий Къазанбиев, Дагъыстан Республиканы Гьисап палатасыны коллективи ва ону ёлбашчысы Билал Жагьбаров ортакъчылыкъ этдилер.
Ярышлагъа багъышлангъан шатлы жыйынны ача туруп, Къапур Исаев гелген кёп санавдагъы къонакъланы къаршылап, олагъа баракалла билдирди. Оьзюню сёйлевюнде районну башчысы спортчуланы оьсюп гелеген наслусуна аты дюньягъа белгили болгъан спортну усталарындан уьлгю алып оьрлюклеге талпынмакъны ёрады.
Жыйылгъанланы алдында Магьамматгьасан Абушев де сёйледи ва районну ёлбашчыларына, ярышланы оьтгерегенлеге, гелген къонакълагъа, ортакъчылыкъ этеген спортчулагъа оьзюню ягъындан да баракалла билдирди.
Ярышларда алдынлы ерлер алгъан ортакъчыларыны барысына да М.Абушевни атындан акъча савгъатлар, кубоклар ва дипломлар тапшурулду.
Р. МУСАЕВА.
Автор чыгъаргъан сурат.
