Оюн Каспийскидеги «Анжи – Аренада» эшеген къабу ел булан сувлу къарны тюбюнде башланды. Бизинкилер оюнну башлагъан кююн гёрген къаравчулар Дагъыстангъа гелген къонакълар очколар алмагъа чы нечик де, есилени къапусуна бир гол сама гийирип болажакъ деп ойлашмагъандыр. Тек…
Оюнну еттинчи минутунда бек онгайлы мюгьлет табып, Комков башы булан уруп, топну къонакъланы къапусуну гёнделен багъанасыны уьстюнден йиберди. Оюнну онунчу минутунда Максимов ургъан сув топну къонакъланы къапучусу къолу булан толу кюйде токътатып болмайлы сыпкъырылгъан топгъа уруп, Боли оюнну санавун ачды. Голдон сонг да бизинкилер чапгъынларын давам этди. Бирини артындан бири дегенлей къонакъланы къапусуну алдында къоркъунчлу мюгьлетлер де болду. Тек шоланы бириси сама натижалы болмады.
Йигирма сегизинчи минутда бизин ярым якълавчубуз Чуперканы ва якълавчуларыбыз Зотов ва Аравинни хатасындан пайдаланып, «Сибирни» оюнчусу Житнёв оюнну санавун тенглешдирди. Арадан он минут да гетмейли, кёп сийрек болагъан чапгъынларыны бирисинде къонакълар Кержаковну къапусуна экинчи голну гийирди. Чехиялы «Сибирни» легионери Томаш Выходил бизин якълавчулардан алдынлыкъ этип, гезикли голну да автору болду. Сонг дагъы да беш минут да гетмейли, къайтып алда эсгерилген Чуперканы ва Аравинни хатасындан сонг, къонакъ Иванов «Анжиге» уьчюнчю голну гийирди. Шолайлыкъда, оюнну санаву 1:3 болду. Уьч де гол «Анжини» къапуларына он эки минутну ичинде гирди. Гьали болгъанчагъа бизин майдангъа гелип, он эки минутну ичинде уьч гол гийирип бир команда да болмагъан. Турнир таблицаны он еттинчи ерине ес болуп турагъан «Сибирь» буса болду.
Биринчи тайм битмеге къалгъан аз заманны ичинде савлай экинчи таймны да «Анжи» чапгъын эте туруп йиберди. «Сибирь» буса бары да он бир де оюнчусун оьз къапуларына тартып, не герек этип де бизинкилени чапгъынларын бузмагъа къаст этип турду. Шону натижасында шо оюнда алдына салгъан мурадына етишип, Гордеевни командасы Дагъыстандан уьч очко алып гетди.
Оюн битгенде мен берген соравгъа Гордеев:
– Биз «Анжини» бары да оюнларына къарап, гёзден гечирген эдик. Сизин команданы гючлю ва осал ерлерин де гьисапгъа алып, оьзюбюзню оюнубузну шогъар гёре тиздик. Мени футболистлеримни оюну булан мен бугюн рази къалдым,– деп жавап берди.
Гертилей де, бизин «Анжи» артгъа тартылып ойнайгъан командалар булан бек къыйын ойнай. Бу оюнну барышында да, нечакъы арив футбол гёрсетсе де, команда утдурду.
Якълавчуланы хаталары болса да, команда нечакъы да гьаракат этегенни гёрюп, къаравчулар бу гезик футболистлеге ончакъы къарсаламады. Гьали энни бизин командагъа гезикли оюнларын Ярославлде ва Калининградда къонакълыкъда оьтгермеге тарыкъ.
Шарапутдин КИШИЕВ.
СУРАТДА: Боли оюнну санавун ачгъан сонг.
