Округну ярышлары биринчилей оьтгерилди

    Округну ярышлары Бабаюртда оьтгерилсин учун Дагъыстанны авур атлетика федерациясыны президенти Адилхан Гьанакъаев уллу къошум этди ва ол ярышланы баш спонсору  да болду.

    Бабаюрт райондан СССР-ни ва Россияны спортуну 20-дан да артыкъ усталары чыкъгъан. Артдагъы йылларда буса бабаюртлу Арсен Борагъанов Россияны чемпионатында экинчи ва кубогунда уьчюнчю савгъатны къазангъан. Ол гьали Россияны жыйым командасына гирген. Бирдагъы бир бабаюртлу Рустам Бийболатов – яшёрюмлени арасында Россияны эки керен чемпиону.

    Ярышланы ачылывунда «Бабаюрт район» муниципал къурулувуну башчысы Дадай Даветеев, район админист­рацияны башчысы Жанболат Шайыбов, Россияны ат къазангъан тренерлери Арип Пирбудагъов, Омар Абдувадудов ва «Россияны инг де яхшы яш тренери» деген атны къазангъан «Дагъыстан Республиканы физкультурасыны ва спортуну ат къазангъан къуллукъчусу» Абсалютдин Борагъанов ортакъчылыкъ этдилер.

    – Округну ярышлары Бабаюртда биринчилей оьтгерилегени бизин бек сююндюре. Бизин атлетлерибиз артдагъы йылларда Россияны ва округну чемпионатларында кёп керен савгъатлар къазанып туралар. Бу ярышланы биз оьр даражада ва къурумлу оьтгерме бек къаст этдик. Бары да ортакъчыланы атындан Адилхан Гьанакъаевге баракалла билдиремен, – деди оьзюню сёйлевюнде Дадай Даветеев.

    – Гертиден де, бизин юртда авур атлетиканы уллу байрамы болду. Округну беш республикасындан гелип яш атлетлер гюч сынадылар. ДР-ни авур атлетика федерациясыны президенти ва район администрация  ярышланы арив оьтгерме кёп иш этди, – деди Абсалютдин Борагъанов.

    Дагъыстанны жыйым командасыны баш тренери Олхозур Элмурзаев ярышлардан сонг булай деди:

    – Уланлардан къурулгъан командабыз уьчюнчю ва къызлардан къурулгъан команда биринчи ерлени алдылар. Шо яхшы натижа деп эсиме геле.



Измулла ГЬАЖИЕВ.

СУРАТДА: ярышдан гёрюнюш.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля