57 кило авурлукъда тутушгъан Нариман Исрапилов башлап японлу Юки Хакехашини 8:2 санав булан утгъан. Экинчи тутушуву ону ерли спортсмен Афган Хашалов булан болгъан. Ону да гёрсетилген болжалдан алда утгъан. Иранлы Реза Атри де Наримангъа къаршылыкъ этмеге бажармагъан ва 2:12 санав булан утдургъан. Инбашы авуртагъаны себеп болуп, биринчи ер учун ябушма чыкъмагъа болмагъан. Ол экинчи ерни къазангъан ва гюмюш медаль булан савгъатлангъан.
Ярышларда бизин бирдагъы айтылгъан кочабыбыз Ильяс Бекболатов да уьчюнчю ерге ес болгъан. Бу гезик ол янгы 70 кило авурлукъда тутушгъан. Шогъар да къарамайлы, Ильяс Азербайжанны жыйым командасына гирген дагъыстанлы кочап Гьажимурат Омаровну утгъан. Экинчи ябушувунда дагъыстанлы кочап Гьитиномагьаммат Гьажиевден оьтмеге бажармагъан. Беларуссиялы кочап Рашитханов булангъы уьчюнчю тутушувун ол 10:0 санав булан битдирген.
Эки де кочапны ва оланы тренери Магьаммат Хасболатович Магьамматовну Бакюде етишген уьстюнлюгю булан гьакъ юрекден къутлайбыз. Европаны, дюньяны халчаларында оланы гьарисине янгы ва уллу уьстюнлюклер ёрайбыз.
Автор: Магьамматрасул Ибрагьимов.
Къаягент район.
