Хасавюртлулар округда уьст гелди

Оланы арасында кёбюсю хасавюртлулар эди. Ярышларда биринчи ерни алма сюегенлер кёп болду. Шону учун халчаларда бек къужурлу ва къызгъын тогъа тартывлар юрюлдю. Округну чемпионларыны арасында Къаягент юртдан Шихсайит Жалилов да бар эди. Ол 65 кило авурлукъда ярышларда алты керен ябушду. Финалда къумукъ улан Къабарты-Балкъар Республикадан гелген Руслан Бесланеев булан ёлукъду ва утма болду. Гьали ол Якутск шагьарда июнда оьтгерилежек Россияны чемпионатында ортакъчылыкъ этежек.

57 кило авурлукъда финалда хасавюртлулар Зелимхан Давутовну ва Исмайыл Мусакъаевни ёлугъуву 12:9 санав булан Зелимханны пайдасына битди. 61 кило авурлукъда да финалда хасавюртлулар ёлукъду. Чемпион атны да Рустам Абдурашитов къазанды.

Россияны жыйым командасыны члени, Хасав­юртдагъы Олимпия училищеден Камал Маликов 74 килода осетинли Завур Макиевни утду ва биринчи ерге ес болду.

Умуми гьисапда Якутск шагьарда оьтгерилежек Россияны чемпионатына 28 хасавюртлу баражакъ. Округда 70 кило авурлукъда бешинчи ерни алгъан оьзю ботаюртлу Къарачай-Чергес Республика команда булан гелген Рамазан Арчиханов да Якутскиге баражакъ.

Къабарты-Балкъар Республиканы кочаплары да ярышларда яхшы натижалагъа етишдилер. Олар бир экинчи ва эки уьчюнчю ерлени къазандылар.

Спорт къаладагъы къаравчулар 57 кило авурлукъда оьтгерилген ёлугъувланы бек ушатдылар. Шо авурлукъда бары да медалланы хасавюртлулар къазандылар.

 

 

 

Съуратда: Ш. Жалилов.

Авторизация
*
*
Регистрация
*
*
*
Согласны с условиями сайта?
Генерация пароля