«ХАСАВЮРТ» УТДУ

Хасавюртлулар къонакъланы къапуларына дёрт топ гийирме болдулар. Къонакълар буса эки топ гийирдилер. Оюн 4:2 санав булан «Хасавюрт» команданы пайдасына битди.

Гьали Хасавюрт команданы 13 очкосу болду. Олар 18 топ гийирген ва 17 топ оьзлени къапуларына йиберген. Къыбла округну чемпионатында бу йыл 11 команда ойнай. Чемпионатда биринчи ерде Магьачкъаланы «Политех» деген командасы бара. Оланы 20 очкосу бар.

– Уьчюнчю дивизиондагъы чемпионатда Къыбла ва Темиркъазыкъ округлардан 11 команда ортакъчылыкъ эте. Олар гьар оюнда утма къаст этип ойнайлар. Бугюнгю оюнда бизин команданы футболистлери бек арив ойнадылар ва утма болдулар. Ёлу­гъувда Магьаммат Гьанакъаев, Рашит Гьасанов ва Муслим Абдуллаев яхшы оюн гёрсетдилер, – деди «Хасавюрт» команданы вакили Шамил Умаров.

 

Камил ХУНКЕРОВ чыгъаргъан сурат.

 

 

 

 

Гьюсемегентли – дюньяны чемпиону

 

Пекинде ябушувну кунг фу деген журасындан дюнья­ны гезикли чемпионаты оьтгерилген.

 

Шонда дюньяны, Европаны ва Американы айтылгъан чемпионлары да болгъан.

Магьачкъаладагъы «Возрождение» деген спорт клубдан шо ярышларда ортакъчылыкъ этген гьюсемегентли 23 йыллыкъ къумукъ улан Али Магьамматов 60 кило авурлукъда дюньяны чемпиону болуп къайтгъан. Али шо ярышларда китайлыны, сонг азербайжанлыны утуп, финалда эрменили булан ёлукъгъан.

Финал ёлугъув ерли китайлы къаравчуланы тергевюн тартгъан. Али бары да къастлыгъын ва техникасын салып ябушгъан ва утгъан.

– Эрменили булангъы ёлугъув­ну башында бираз къы­йын болду. Тек мен, ону уьчюнчю раундда онг тобугъум булан уруп, ону нокаутгъа йиберме болдум. Сонг судья ёлугъувну токътатды ва магъа утушну бердилер, – деди дюньяны чемпиону Али Магьамматов.

Къумукъ улангъа алтын медаль тапшурулгъан. Ол гьали дюньяны эки керен чемпиону. Али Магьачкъаладагъы Правовой академияны студенти де дюр. Ону ярышлагъа Россияны ат къазангъан тренери Багьавдин Чаптиев гьазирлеген.

Алини бу уллу уьстюнлюгю булан биз де къутлайбыз.

 

Суратда: Али Магьамматов.

 

 

 

Биринчи ерни алгъан

 

Польшадагъы Даброво деген шагьарында тутушуп ябушувдан Вацлав Циалковскини эсделигине халкъара турнир 23-нчю керен оьтгерилген. Ярышларда Европаны, Азияны гючлю кочаплары ортакъчылыкъ этген.

Биринчи ерни алгъанланы арасында хамавюртлу Ибрагьим Ильясов да бар. Ол 57 кило авурлукъда финалда япон кочап Азияны ва Японияны чемпиону Юки Такахашини утгъан ва алтын медальгъа ес болгъан.

Артдагъы беш йылны ичинде ол Хасавюртдагъы Ш. Умахановну атындагъы хас олимпия спорт школада тренировкалар оьтгере эди.Бу йылдан тутуп буса, Ибрагьим Калининград шагьар учун ябуша.

Эки йыл алда хамавюртлу кочап яшланы арасында оьтгерилген Европаны чемпионатында биринчи ерни де къазангъаны эсибизде.

Бугюн ол 57 кило авурлукъда, Россияны жыйым командасына къошулуп, кёп уллу ярышларда ортакъчылыкъ этип тура ва савгъатлар да къазангъан.

 

Суратда: И. Ильясов.

Автор чыгъаргъан сурат.

 

 

 

ОЬТЕМИШЛИ ЯШ САМБИСТ

 

Пенза шагьарда самбо ябушувдан 18-19 йыллыкъ яшланы арасында Россияны спартакиадасы оьтгерилген. Шо ярышларда Россияны федерал округларында биринчи ерлени къазангъан самбистлер ортакъчылыкъ этгенлер.

 

Къаягент районну Оьтемиш юртунда тувгъан бугюн Урал федерал округну командасы учун ябушагъан Расул Гьажиев 68 кило авурлукъда спартакиадада уьчюнчю савгъатгъа ес болгъан. Самбодан оьзюню чагъындагъы яшланы арасында 2012-нчи йылда Европаны чемпиону болгъан къумукъ яш Россияны самбистлерини арасында да оьзюн гёрсетме болгъан.

Оьтемишли улан 2008-нчи йылда дзюдо ябушувдан да Европаны кубогуну ярышларында савгъатлы ерни къазангъан. Айтагъаным, ол самбо ва дзюдо ябушувларда уллу гележеги бар кочап.

Расулну атасы Магьамматшапи Гьажиев де алдын белгили самбист болгъан. 1993-нчю йылда оьтгерилген дюньяны чемпионатында бронза медаль къазангъан. Бугюн ол йыракъ Ханты-Мансийск округда тренер болуп ишлей.

 

 

 

Измулла ГЬАЖИЕВ.

 

Авторизация
*
*
Регистрация
*
*
*
Согласны с условиями сайта?
Генерация пароля