«ХАСАВЮРТ» УЬЧЮНЧЮ ЛИГАДА ОЙНАЖАКЪ

– Кёп йыллар алда «Хасавюрт» команда уьчюнчю лигада ойнагъаны белгили. Янгы­дан къайтып ойнама не себеплер болду?

 

– Мен Ростов шагьарда Къыбла федерал округну футбол федерациясыны жаваплы къуллукъчусу Сергей Парядин булан ёлукъдум. Ёлугъувда бизин команда уьчюнчю лигада ойнама сюегенни англатдым ва бары да кагъыз документлени огъар тапшурдум. Федерацияда мени тилевюмню арив гёрдюлер ва якъладылар. Къыбла федерал округну федерациясындан магъа кёп англатыв якъдан кёмек де болду.

 

– Бугюн Хасавюртда къырдан гелген командаланы къабул этме стадиону, къонакъюйлери бармы?

 

– Бизин «Спартак» деген стадионда инг де арив футбол газон салынгъан. Шагьарда къонакъюйлер де бар. Гелгенлеге бары да онгайлыкълар болажакъ.

Бизин стадион бары да талаплагъа жавап бере. Бизин командадагъы Азамат Тамаев ва Шамил Алимагьамаев экинчи лигада да ойнагъанын эсгерме сюемен.

 

– Савгъатлы ерлер учун ойнажакъмысыз?

 

– Озокъда ойнажакъбыз. Гележекде бизин экинчи профессионал лигагъа чыкъма хыялыбыз да бар.

 

– Уьчюнчю лигада ортакъчылыкъ этме харж герек. Сизге ким кёмек эте?

 

– Бир башлап шагьарны башчысы Сайитпаша Умахановгъа, шагьар администрацияны башчысы Арслан Арслановгъа ва Дагъыстан Республиканы Халкъ Жыйыныны депутаты Далгьат Магьачевге команданы атындан баракалламны билдиремен. «Анжи» деген команданы футболисти де бизге 17 топ савгъат этди.

Ярышланы биринчи оюну 15-нчи майда оьтгерилежек. Команда яхшы гьазирлик гёрюп тура.

Уьчюнчю лигадагъы командаланы арасында яхшы ойнама къаст этежекбиз.

 

 

Измулла ГЬАЖИЕВ.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля