Игитни эсделигине багъышлангъан

                    


Каспийск шагьарда Али Алиевни атындагъы спортну ва яшёрюмлерини къаласында ноябр айны 18-нде ва 19-унда ябушувну самбо журасындан Россияны Игити Адилгерей Магьамматтагьировну эсделигине багъышлангъан ярышлар оьтгерилди. Оьзюню барышында юрюлген тогъатартывларда 150-ден де артыкъ спортчу ортакъчылыкъ этген шо ярышларда 9 тюрлю авурлукъда инг бажарывлу кочаплар мекенли болду.

Оьтгерилеген ярышланы ортакъчыларын Дагъыстанны Гьукуматыны ёлбашчысыны биринчи заместителини борчларын кютеген Анатолий Карибов къутлап сёйледи. Ол оьзюню сёйлевюнде ярышлар оьр даражада оьтгерилежегине шеклик этмейгенин билдире туруп, шолар ябушувну эсгерилген журасыны яйылывуна болушлукъ этежегине инанагъаны гьакъда айтды.


Дагъыстанны ич ишлер минис­терлигини управлениесини начальниги Сахават Сахаватов, ДР-ни Гьукуматыны ёлбашчысыны заместители Шамил Исаев, отставкадагъы генерал-майор Омар Муртузалиев ва кёп оьзгелери  ярышланы ортакъчыларына оьз­лени къутлавларын етишдирди.


Шондан сонг, ябушувну самбо журасы булан машгъул болагъан дагъыстанлы бажарывлу кочаплагъа спортну халкъара даражалы усталарыны шагьатнамалары берилди.


Ярышны баш савгъаты 57 кило авурлукъда алдынлыкъ алгъан Рашит Вагьабовгъа тапшурулду. Ону булан бирче гьар тюрлю авурлукъларда Исрайыл Гьажиагъаев, Велимурат Алхасов, Самат Абдулманапов, Мурат Тляруков,  Шамил-агъа Амиров, Сайит Сайитов, Гьадис Ибрагьимов, Паша Хархачаев  биринчи ерлени алды.

СУРАТДА: ярышланы вакътисиндеги тогъатартывларыны бирисини мюгьлети.




 

Авторизация
*
*
Регистрация
*
*
*
Согласны с условиями сайта?
Генерация пароля