Хасавюртда дзюдо ябушувдан Темиркъазыкъ-Кавказ федерал округну эргишилени ва къатынгишилени арасында оьтгерилген ярышларында 205 спортсмен ортакъчылыкъ этген. Ярышлагъа 6 респуб­ликаны ва 1 крайны командалары гелген эди. Гьюрметли къонакъланы арасында Россияны ат къазангъан тренерлери Абдурагьим Элдерханов, Али Бекузаров, Гьабип Магьамматов, Магьаммат Емкужев, Олимпия оюнларда бронза медаллар къазангъан Гьасанби Таов ва Анатолий Ларюков бар эди.



Ярышланы ачылывунда Хасавюрт шагьар жыйынны председателини заместители Мугьажир Салагьбеков, Дагъыстан Республиканы спортгъа ва физкультурагъа къарайгъан министрини заместители Гьажимурат Магьамматов ва дзюдо федерацияны департаментини ёлбашчысы Анатолий Ларюков чыгъып сёйледилер.

Эки гюн юрюлген ярышларда Да­гъыстанны дзюдоистлери бир биринчи, эки экинчи ва етти уьчюнчю ерлени къазандылар. Эргишилени арасында къызылюртлу Сабир Давутов 66 кило авурлукъда округну чемпиону болду. 100 кило авурлукъда магьачкъалалы Гьайбулла Магьамматов экинчи ерни алды.

Къатынгишилени арасында 48 кило авурлукъда магьачкъалалы къумукъ къыз Камила Магьамматова экинчи савгъатгъа ес болду. Хасавюртлу къумукъ къыз Заира Алинчиева 52 кило авурлукъда гюмюш медаль къазанды.

Уьчюнчю ерлеге дагъыстанлылардан Казимет Гьажиев (60 кило), Арсен Омаров (100 кило), Патимат Гьажиева (57 кило), Марьям Гьамзатова (63 кило), Бюлбюл Магьамматова (70 кило), Салимат Омарова ва Луиза Шагьмуратова (78 кило) ес болдулар.

– Бу ярышларда 1–6-нчы ерлени къазангъан эргишилер ва 1–2-нчи ерлени алгъан къатынгишилер октябр айда Санкт-Петербургда оьтгерилежек Россияны чемпионатында ортакъчылыкъ этежеклер.

Бизин Дагъыстан команданы экевю округну чемпионлары болар деп умут эте эдик. Тек олар экинчи ерлени алдылар. Шо да яман тюгюл. Ингдеси, олар оьзлени Россияны чемпионатында гёрсетме болар деп эсиме геле, – деди Россияны ат къазангъан тренери, къумукъ къыз Зайнап Датуева.

Дзюдо федерацияны вакили, Россияны ат къазангъан тренери шавхалянгыюртлу къумукъ улан Абдурагьим Элдарханов булай деди:

– Бир башлап, ярышлар бек арив ва къурумлу оьтгерилгенни эсгерме сюемен. Экинчилей, шу ярышланы оьтгерме къаст этген Хасавюрт шагьарны администрациясына баракалламны да билдирме сюемен.

Суратларда: (онгда) З.Алинчиева; ярышлардан гёрюнюш.

Автор чыгъаргъан суратлар.